«Успуорт норуоттары ситимниир»

«Азия оҕолоро» норуоттар икки ардыларынааҕы спортивнай оонньуулар саҕаланыыларыгар ыҥырыылаах ыалдьыттар тыл эттилэр.

Арассыыйа успордун миниистирэ Михаил Дегтярев бэрэсидьиэн Владимир Путин эҕэрдэтин ааҕан иһитиннэрдэ.
— 24 спорт көрүҥэр 239 мэтээл кэмпилиэгэ оонньонуоҕа. Тыҥааһыннаах киирсиилэри тэҥэ, эһигини элбэх көрсүһүүлэр, билсиһиилэр күүтэллэр. Успуорт континеннары, дойдулары, норуоттары доҕордоһуннарар, — диэн миниистир эттэ.

Станислав Поздняков, Арассыыйа Олимпийскай кэмитиэтин бэрэсидьиэнэ:
— Эһиги Арассыыйа бэртээхэй эрэгийиэнин — дириҥ устуоруйалаах Саха сирин туһунан элбэҕи билиэххит. Бу урукку оонньууларга кыттыбыт оҕолор аан дойду, Олимпиада чөмпүйүөннэрэ буолбуттара. Эһиги эмиэ кинилэр суолларын хатылыыргытыгар баҕарабын! «Азия оҕолоро» үрдүк кыайыыларга үктэл буолар! — диэтэ.
«Биһиги кыттыбыт оҕолорбутун барыларын өйдүүбүт, кэтээн көрөбүт. Улаатан баран, бэйэҕит оҕолору илдьэ кэлэргититтэн олус үөрэбит», — диэн «Азия оҕолорун» дириэксийэтин дириэктэрэ Владимир Максимов тоһоҕолоон бэлиэтээтэ.
Кини «Азия оҕолорун» төрүттээбит бастакы бэрэсидьиэн Михаил Николаев өҥөтүн аҕынна. Сонно тута улахан экраҥҥа Михаил Ефимович бастакы оонньууларга тыл эппитэ көһүннэ. Кини ыра санаатын — Саха сириттэн төрүттэммит оонньуулар аан дойду улахан, бэлиэ күрэхтэһиитигэр, дойдулары түмэр түһүлгэҕэ кубулуйуон баҕарарын эттэ. Көрөөччүлэр ону сүһүөхтэригэр туран, долгуйа иһиттилэр, сорохтор уйадыйдылар. Бу быйыл кинитэ суох бастакы оонньуу буолар.
Кыттааччылар ааттарыттан Данил Копылов харда тыл эттэ.
Ил Дархан Айсен Николаев:
— Мин элбэх дойдулартан элбэх доҕотторбутун көрсөрбүттэн долгуйабын. Бу күнү өр күүппүппүт. Биһиги бары киэҥ нэлэмэн Сахабыт сиринэн киэн туттабыт. Бүгүн Саха сирэ Арассыыйа тэтимнээхтик сайдан иһэр, биир бастыҥ эрэгийиэнэ буолар.
Владимир Путин уонча хонуктааҕыта бу стадиоҥҥа сылдьан, оонньууларга бэлэмнэнии хайдах баран иһэрин бэоэбиэркэлээбитэ. «Азия оҕолоро» — аан дойдуга оҕолорго аналлаах саамай бөдөҥ күрэхтэһии буолар. Бары кыттааччылар дойдуларыгар тиийэн, эйэ, доҕордоһуу посоллара буолуохтара диэн эрэнэбин! Нөрүөн нөргүй буоллун, ыччат доҕордоһуутун түһүлгэтигэр! Ахсыс төгүлүн ыытыллар «Азия оҕолорун» аһыллыбытынан биллэрэбит! — диэтэ.
Салгыы театрализованнай көрдөрүү саҕаланна.