Успуорт сонуннара

Мэҥэ Хаҥалас буоксаҕа оскуолатын иитиллээччитэ, спорт үтүөлээх маастара Василий Егоров Хоту Африка Марокко Королевствотыгар буолан ааспыт норуоттар икки ардыларынааҕы турнир кыайыылааҕынан буолла. Россия сүүмэрдэммит хамаандатын чиэһин 51 кг чаҕылхайдык көмүскээтэ. Рингэҕэ үс төгүл таҕыста. Эквадор уонна Марокко боксердарын кыайталаата. Финалга Европа былырыыҥҥы чөмпүйүөнүн испанец Мартин Молины 5:0 итэҕэтиилээхтик хотто, итиэннэ, кыһыл көмүс кур хаһаайынынан буолла, ону сэргэ, кыһыл көмүс мэтээлинэн, 4000 долларынан наҕараадаланна. Василий Егоров тириэньэрэ бииргэ төрөөбүт убайа, буоксаҕа спорт маастара Николай Егоров.

• Сахабыт сирин адаптивнай успуорка спортсменнара Россия күрэхтэһиилэригэр ситиһиилэринэн үөрдэллэр. Амма Болугуруттан төрүттээх-уустаах Виктория Петрова Россия Кубогар дьаадыраны 10 м 04 см ыраахха анньан Россия рекордун олохтоото уонна норуоттар икки ардыларынааҕы кылаастаах маастар нуорматын толордо. Мэҥэ Хаҥалас ыччата Айаал Сивцев Россия Кубогар дьаадыраны анньыыга эмиэ Россия рекордун олохтоото, маастар нуорматын толордо. Виктория Петрованы уонна Айаал Сивцеви тириэньэрдэр Василий Оленов уонна Петр Давыдов эрчийэллэр.

• Өймөкөөн Томторугар түмүктэммит, үтүө үгэскэ кубулутуллан сыллата ыытыллар “Тымныы эргимтэтин” 42 км 95 м уһуннаах классическай марафонугар Саха сириттэн, Удмуртияттан, Владимирскай уонна Тверь уобаластарыттан кэлэн кытыннылар. Эр дьоҥҥо Өлүөхүмэ уҥмат тыҥалаах быһыйа Александр Моедо биэтэккэ бастакынан кэллэ, көрдөрүүтэ 3 чаас 02 мүнүүтэ. диэн Өймөкөөн марафонун икки төгүллээх кыайыылааҕа, быйылгы сүүрүү үрүҥ көмүс призера Чурапчытааҕы спорт институтун научнай үлэһитэ Василий Лукин эһэтин М.М. Мартьяновы 100 сылынан кэриэстээн, ситиһиитин кинини оҕо эрдэҕиттэн бүөбэйдээн улаатыннарбыт  эһэтигэр анаабыта биир кэрэ-бэлиэ түгэн.
  Дьахталларга Уус Алдантан Изабелла Борисова кыайыыны ситистэ, көрдөрүүтэ 3 чаас 35 мүн. 21 км полумарафоҥҥа Леонид Зыков, Полина Слободчикова бастаатылар. 10 км Василий Филиппов, Капиталина Харайданова, 5 км 74 саастаах Степан Лыткин, 30 саастаах Сардаана Федорова бастыҥ көрдөрүүлэннилэр. Аан туманынан оргуйар тымныыга барыта 91 быһый тиийэн сүүрдэ. 70 саастарын лаппа ааспыт Егор Абрамов, Ион Васильев, Мындыр Куйаар, Степан Лыткин, Мария Неустроева, Варвара Макарова, Анастасия Колесова, 80 сааһын ааспыт Филипп Гуляев сааһырыыны киэр кыйдааннар, сүүрэ сылдьаллара кэрэхсэбиллээх.

• “Успех каждоого ребенка” (“Хас биирдии оҕо ситиһиитэ”) федеральнай бырайыак чэрчитинэн өрөспүүбүлүкэ государственнай бүддьүөтүттэн тыа сиригэр баар орто үөрэхтээһин оскуолаларын спортивнай саалаларын саҥардыыга 24,6 мөл.солк.көрүлүннэ. Өрөспүүбүлүкэ бырабыыталыстыбатын уурааҕынан Алдан оройуонун Томмот бөһүөлэгин, Үөһээ Халыма Зырянкатын, Бүлүү Халбаакытын, Өлүөхүмэ 2 № уонна Уус Алдан Тулунатын оскуолаларын спортивнай саалалара өрөмүөннэниэхтэрэ. Чурапчыга Төлөй оскуолатыгар үөрэнэр кылаастар спортивнай саалаҕа кубулутуллан оҥоһуллуохтара. Бу саҥа үүммүт 2023 сылга 36 оскуола спортивнай малынан-салынан уонна тэрилинэн хааччыллыахтара, спортивнай былаһааккалар 10 оскуолаҕа оҥоһуллуохтара. Физкультуранан дьарыктанарга материальнай-техническэй базаны сайыннарыыга өрөспүүбүлүкэ үрдүнэн 37,5 мөл.солк. көмө оҥоһуллуоҕа.

• Кемерово куоракка буолар Норуоттар икки ардыларынааҕы “Азия оҕолорун” 2-с кыһыҥҥы Спортивнай оонньуулар саҕаланаллара икки нэдиэлэ хаалла. Оонньуу Президенэ Владимир Максимов хайыһар уонна керлинг күрэхтэһиилэрэ ыытыллыахтаах “Локомотив” уонна “Сосновай” спортивнай обьектарын, Междуреченск куоракка хайаттан хайыһарынан түһүү комплексын тиийэн көрдө-иһиттэ. Оҕолор кыһыҥҥы Спортивнай оонньууларыгар Азия дойдуларыттан, Белоруссияттан уонна Россия регионнарыттан 1000 кэриҥэ спортсмен оҕо кыттыа. Күрэхтэһиилэр бырагыраамаларыгар хайыһарынан сүүрүү, хаҥкылааһын, ол иһигэр, шорт-трек, керлинг, фигурнай хаҥкылааһын, хоккей, тармплинтан хайыһарынан ыстаныы, фристайл, сноуборд, хайа успуорда уонна хаарга волейболлааһын көрүҥнэрэр бааллар. Онньуулар историяларыгар аан бастакытын киберспорка, хаарга волейболлааһын  уонна компьютернай успуорт киллэрилиннилэр.

“Азия оҕолорун” 2-с кыһыҥҥы Оонньуулара олунньу 23 күнүттэн кулун тутар 5 күнүгэр диэри Кемеровоҕа, таас чоҕунан аатырар Кузбасска буолуохтара.

Баһылай Посельскай,

Дьокуускай.