Успуорт сонуннара
Дьокуускай куорат Марха бөһүөлэккэ киириигэ харбыыр бассейннаах уонна хаҥкылыыр катоктаах, аныгы ирдэбилгэ эппиэттиир толору хааччыллыылаах, сылы эргиччи кыһыннары-сайыннары тохтоло суох үлэлиир кыамталаах саҥа физкультурнай-спортивнай комплекс үлэҕэ киллэрилиннэ. Комплекс “Газпром – оҕолорго” бырагыраама чэрчитинэн тутулунна. Сахабыт сиригэр хоккей уонна шорт-трек күүскэ сайдалларыгар өссө эбии табыгастаах усулуобуйа баар буолла. Саҥа комплекс үөрүүлээхтик аһыллыытыгар Саха Өрөспүүбүлүкэтин Аҕа Баһылыга Айсен Николаев кыттыыны ылла, эҕэрдэтин тиэртэ, ситиһиилэр кэлэллэригэр эрэнэрин биллэрдэ.
Саха Өрөспүүбүлүкэтин бырабыыталыстыбатын бэрэссэдээтэлин солбуйааччы Сергей Местников Москватааҕы сырыытыгар 2024 с. Дьокуускайга буолар Норуоттар икки ардыларынааҕы “Азия оҕолорун” VIII спортивнай оонньууларга бэлэмнэнии уонна ыытыы туһунан Россия Федерациятын Сэбиэтин Кэмитиэтигэр дакылаат оҥордо. Оонньуулар 2024 сыл бэс ыйын 25 – от ыйын 7 күннэригэр ыытыллаллара былааннанар. 13-16 саастаах 3000 кэриҥэ оҕо успуорт 17 көрүҥэр, ол иһигэр, стендэбэй ытыыга, саахымакка, кикбоксиҥҥа, үҥкүү спордун “Брейкинг” көрүҥэр күрэхтэһиэхтэрэ. Оонньуулары көрсө Дьокуускайга икки элбэх функциялаах спортивнай комплекстар тутуллуохтара, 12 эбийиэк өрөмүөннэниэҕэ, ону таһынан, спортивнай имбэнтээрдэр саҥардыллыахтара.
“Азия оҕолорун” оонньууларыгар бэлэмнэнии чэрчитинэн, Сергей Местников Саха Өрөспүүбүлүкэтин физическэй култуураҕа уонна спорка миниистирэ Леонид Спиридоновтыын РФ инвестиционнай сайдыы уонна судаарыстыбаннай баай-дуол Департаменын дириэктэрэ Александр Рослякову, итиэннэ, аан дойдутааҕы улахан мероприятиеларын үүннүүр-тэһиинниир Департаменын дириэктэрин Светлана Миронованы кытта көрсөн кэпсэттилэр. Оонньуулар оҕо спордун сайыннарар, Саха сирэ Чуумпу акыйаан эҥэринээҕи Азия дойдуларын кытта ыкса сыһыаны бөҕөргөтөр уонна Олимпийскай хамсааһын идеяларын пропагандалыыр сыаллаах-соруктаах ыытыллаллар.
Cаха Өрөспүүбүлүкэтин физическэй култуураҕа уонна успуорка миниистирэ Леонид Спиридонов уонна Дьокуускай куорат баһылыга Евгений Григорьев ГТО нормативтарын туттарыыга, кэмпириэнсийэлэри, сэминээрдэри, төгүрүк остуоллары, успуорт эбийиэктэрин тутууларын уонна өрөмүөннэри ыытыыга бииргэ үлэлээһин Сөбүлэһиитин түһэристилэр.
“Модун” споркомплекска буолан ааспыт мас-тардыһыытын Федерациятын Кубогар өрөспүүбүлүкэ чемпионатын түмүгүнэн бастакы миэстэни былдьаһа Мэҥэ Хаҥалас уонна Амма хамаандалара финалга утарыта тахсыбыттарыгар, мэҥэлэр 17:10 ахсаанынан кыайдылар уонна мас тардыһыытын Федерациятын Кубогын хаһаайыттарынан буоллуллар. Таатталар Үөһээ-Бүлүү хамаандатын кыайаннар үһүс миэстэлэннилэр.
Аллараа Бэстээххэ хапсаҕай Федерациятын Кубогар олохтоохтор үрдүк үөрүүлэригэр мэҥэлэр Үөһээ Бүлүүлэри финалга 12:5 хоттулар уонна 21 сыл буолан баран Федерация Кубогын бэһис төгүлүн бэйэлэригэр төннөрдүлэр. Бириистээх үһүс миэстэҕэ Нам хамаандата таҕыста.
Владимирскай уобалас Суздаль куоратыгар түмүктэммит аан дойду пауэрлифтинга чөмпүйэнээтигэр Нам улууһун дэгиттэр күүстээҕэ Евгений Иванов үрдүк ситиһиилэннэ. 40-49 саастаах бэтэрээннэр бөлөхтөрүгэр 125 кг ыйааһыннаахтарга кыттан “Аполлон Аксель” диэн упражнениеҕа 190 кг ылан эр дьоҥҥо үрүҥ көмүс тиксэн , бэтэрээннэргэ кыһыл көмүс мэтээллэннэ уонна абсолютнай иккис үчүгэй көрдөрүүлэннэ. Евгений Иванов “Роллинг Тандер” диэн упражнениеҕа абсолютнай чөмпүйүөн аатын ылла. Бу көрдөрүүтүнэн тус бэйэтин рекордун олохтоото уонна Арассыыйа маастарын нуорматын толордо. Становой тягаҕа 275 кг тардан бэтэрээннэргэ бастаата, онтон эр дьоҥҥо иккис миэстэлэннэ.
Ахсынньы 23-25 күннэригэр Дагестан Хасавюрт куоратыгар түмүктэммит көҥүл тустуу норуоттар икки ардыларынааҕы турнирыгар ордук тахсыылаахтык 18 бөҕөс көбүөргэ тахсыбыт саамай ыарахан ыйааһыҥҥа Муома күүстээх ыччата Никита Хабаров туһунна. Үһүс миэстэ иһин хапсыһыыга Дагестантан Хабиб Давудгаджиевы 3:2 хотон боруонса мэтээли ылары ситистэ.
Эмиэ ити күннэргэ Красноярскайга буолан ааспыт РФ Үлэтин Геройа, ССРС, РФ үтүөлээх тириэньэрэ Миндиашвили Бүтүн Арассыыйатааҕы көҥүл тустууга турнирыгар 92 кг Никита Софронов кыһыл көмүс мэтээли ылары ситистэ, 57 кг Дьулустаан Федотов, 97 кг Максим Толмачев уонна 125 кг Эдуард Максимов бириистээх миэстэлэргэ тигистилэр.
Новосибирскайга хайыһар Бүтүн Арассыыйатааҕы “Сибиир Кубогар” Сахабыт сирин маастардара Алдантан Михаил Соснин кыһыл көмүс, Нерюнгриттэн Александр Филиппов үрүҥ көмүс, Амматтан Никита Шестаков боруонса мэтээллэри ылаттаатылар. Анастасия Дубова (Алдан) икки боруонса мэтээллэннэ.
Дьокуускай куорат 202 мкр Саха АССР култууратын үтүөлээх үлэһитэ, Д.П.Коркин аатынан Государственнай бириэмийэ лауреата, Аҕа дойду сэриитин кыттыылааҕа, ССРС физическэй култуураҕа туйгуна Семен Семенович Жирковка мемориальнай дуоска туруорулунна.
СӨ успуорка миниистирэ Леонид Спиридонов, өрөспүүбүлүкэ сүүмэрдэммит хамаандаларын бэлэмниир киин дириэктэрэ Михаил Пахомов, министиэристибэ иһинэн үлэлиир биэдэмистибэннэй тэрилтэлэр салайааччылара Роман Оконешников (маассабай успуорт), Семен Чердонов (Олимпийскай эрэллэри бэлэмниир училище), Николай Цыпандин (футбол оскуолата), Петр Черкашин (харбааһын оскуолата), Владимир Хисамутдинов (хоккей оскуолата), Ньургун Иванов (адаптивнай успуорт), Михаил Варламов (оҕо успуорда) бары тутуспутунан “Үтүө санаа” харыйатын аахсыйатыгар көхтөөхтүк кытыннылар, оҕолорго Саҥа Дьыллааҕы бэлэхтэри туттартаатылар.
Баһылай Посельскай,
Дьокуускай.
Сообщить об опечатке
Текст, который будет отправлен нашим редакторам: