Устудьуон быраактыкатыгар страховой ыстаас ааҕыллар

От ыйыгар устудьуоннар быраактыкаларын үгэнэ. Абитуриеннарга эмиэ буһуу-хатыы, тургутуу кэмэ саҕаланна. Оттон устудьуон быраактыкаланар кэмигэр биэнсийэтигэр страховой ыстаас аахсыан сөбүн туһунан билэҕин дуо?

Социальнай пуонда Саха сиринээҕи салаата иһитиннэрбитинэн, устудьуон быраактыкалана сылдьан, гражданскай-быраап (ГПХ), эбэтэр, үлэ дуогабарын түһэрсибит буоллаҕына, тэрилтэ киниэхэ страховой усунуоһу төлүүр, оччотугар биэнсийэтигэр страховой ыстаас ааҕыллар. Ол эбэтэр, бастакы үлэ миэстэтин курдук ааҕыллан, биэнсийэтэ мунньуллан киирэн барар.

Үлэ киниискэтэ үлэ дуогабарын түһэрсибит эрэ буоллахха, оҥоһуллар. Өскөтүн устудьуоҥҥа бу бастакы үлэ миэстэтэ буоллаҕына, үлэ киниискэтэ киниэхэ электроннай көрүҥүнэн оҥоһуллар.

Сайын элбэх үлэһит уоппускаҕа барар, онон устудьуоннар кинилэри солбуйан, быстах кэмҥэ (1-2 ый) гражданскай-быраап дуогабарын түһэрсэн, харчылаһа түһүөхтэрин, уопутуруохтарын  уонна биэнсийэлэригэр, кыра да буоллар, мунньунуохтарын сөп. Бу туһунан устудьуоннар, кинилэр төрөппүттэрэ да билиэхтэрин наада эбит.