Устудьуон уорууга уорбаланар

Дьокуускай куорат 2-с №-дээх полиция отделыгар устудьуон малын уорбуттарын туһунан сайабылыанньа суруйбут.

Кини сайабылыанньаҕа уопсай дьиэттэн көһөрүгэр мала-сала: комбинезон пуховига, маҥан ырбаахыта, 2 паара джинсы ыстаана уонна баайыы сибиитирэтэ сүппүтүн тыллаабыт.
Холуобунай ирдэбил үлэһиттэрин суһал-көрдүүр үлэлэрин түмүгэр ким уорууга уорбаланааччыны быһаарбыттар.

Уорбаланааччы 20 саастаах, эмсэҕэлээччини кытары биир уопсайга олорбут устудьуон эбит. Силиэстийэ быһаарбытынан, эмсэҕэлээччи көһөрүгэр аанын саппатах, ону туһанан бу эдэр киһи киирэн таҥаһы-сабы уорбут. Уорбаланааччы полиция үлэһитэригэр таҥаһы бэйэм таҥнаары уорбутум диэбит.

Киниэхэ РФ Холуобунай Кодексатын 158 ыст. 3 ч. «Уоруу» диэнинэн холуобунай дьыала тэрилиннэ.
Бу ыстатыйанан 6 сылга диэри болдьоххо көҥүлү быһыы накаастабыл миэрэтэ көрүллэр диэн СӨ ИДьМ пресс-сулууспата иһитиннэрэр.