Устудьуоҥка түөкүттэргэ 1 мөл.солк. тахса харчыны ыыппыт

Сунтаар улууһуттан төрүттээх 20 саастаах устудьуон кыыска эр киһи төлөпүөннээн, суотабай хампаанньа операторабын дэммит. Эр киһи кыыска сотору кэминэн кини сим-каартатын болдьоҕо тахсарын туһунан иһитиннэрбит. Онуоха устудьуоҥка түөкүттэр эрийэллэр дии санаабыт уонна төлөпүөнүн ууран кэбиспит. Ол эрээри, «оператор» өссө эрийэн, кыыһы тылыгар киллэрэн, 1 мөл.солк. тахса суумаҕа албыннаабыт. Бу туһунан СӨ ИДьМ пресс-сулууспата иһитиннэрэр.

Хара санаалаах киһи кыыска өссө эрийэн, нүөмэри блоктаабат туһуттан СНИЛС-ын нүөмэрин уонна «Госуслугалар» порталыгар кэлбит куоду этэрэ ирдэнэрин иһитиннэрбит. Онуоха кыыс этэн биэрбит.

Салгыы кыыс «Госуслугалар» порталыгар баар тус кабинетын арыйбыттарын туһунан иһитиннэриини туппут, онно ыйыллыбыт суһал лииньийэҕэ эрийбит. Төлөпүөннээбитигэр, кини докумуоннара түөкүттэргэ баар буолуон, онон туһанан кини аатыгар кирэдьиит ылыахтарын сөбүн эппиттэр. Онон салгыы Киин Баан үлэһитин кытта кэпсэт диэн холбообуттар. Аны бу киһи кыыска уурунуу харчыгын барытын «куттала суох счекка» ыыт диэбит. Онон бүтэн хаалбакка, өссө кирэдьиит ылларбыт. Тугу эппитин барытын кыыс оҥорон испит. Бүтүүтүгэр кимҥэ да кэпсээмээр, 250 тыһ.солк. ыстарааптаныаҕын диэбит.

Бүтэр бүппүтүн кэнниттэн кыыс социальнай ситимнэри көрө олорон, кини курдук балаһыанньаҕа түбэһэ сыспыт кыыс туһунан аахпыт. Ол кэнниттэн биирдэ кини дьэ, түөкүттэр угаайыларыгар киирэн, 1 мөл. 190 тыһ.солк. суйдаппытын өйдөөбүт.