Устудьуоннар этэрээттэрэ — бу улахан күүс, бу ыччат романтиката!

Кэрискэ мырааннар анныларынан киэҥ айан суола тыргыллар. Бу Покровскайдыыр тракт устун утуу — субуу үс оптуобус иһэр. Бу оптуобустарга аҕам саастаах эрээри эдэрдии эрчимнээх, күлбүт-үөрбүт бэрт элбэх киһи олороллор.

Бу кимнээҕий диэтэргит, Саха судаарыстыбаннай үнүбэрситиэтин араас сылларга бүтэрбит, эдэркээн саастарыгар устудьуоннар тутар этэрээттэригэр байыас быһыытынан сылдьыбыт дьон.

Тутар этэрээттэр бэтэрээн байыастарын 1 сүлүөтэ Хаҥалас улууһун биир кэрэ сиригэр — Орто дойдуга буолан ааста. Манна бааллар төрөөбүт өрөспүүбүлүкэлэрин уйгутун уһансыбыт «Аргыс», «Софим», «Маарыкчаан», «Чайка», «Дьулуур», «Чэчир» о.д.а. этэрээттэр байыастара.

Кинилэр өрөспүүбүлүкэ араас оройуоннарыгар араас тутуулары туппуттара, дьон-сэргэ махталын ылбыттара. Кинилэртэн хас биирдиилэрэ, сэбиэскэй бэйиэт Владимир Маяковскайдыы эттэххэ:»Это мой труд вливается в труд моей республики!» диэн киэн тутта этэр кыахтаахтар. Ол да иһин сүлүөт күн бэтэрээн байыастар эдэр саастарын эргитэн, уҥуохтуун көннүлэр, дууһалыын долгуйдулар, ыллаатылар — туойдулар, үҥкүүлээн тэйдилэр, оһуокайдаан ойдулар!

Мин биир бэйэм олус диэн биһирии, хайҕыы иһиттим биир бастакынан тэриллибит «Софим» этэрээт байыастарын отчуотун. Кинилэр бэйэлэрин утумнуур саҥа «Софим» этэрээти тэрийбиттэр, сүлүөтү көрсө урут үлэлээбит сирдэринэн автотур оҥорбуттар, биэнсийэлэриттэн мунньан хардарыта көмө каассатын үлэлэтэллэр эбит. Билиҥҥи кэм устудьуоннарын кытта ыкса ситимнээхтик үлэлииллэрэ харахха тута быраҕыллар. Бу софимнар бачыымнарын атын бэтэрээн байыастар батыһаллара буоллар, хайҕаллаах дьыала буолуо этэ!

Биһиги үлэлээбит «Аргыс» этэрээппит СГУ эмиэ биир кырдьаҕас тутар этэрээтэ буолар. Үс сайыны быһа бииргэ үлэлээбит доҕотторбун туохтааҕар да күндүтүк саныыбын. Кинилэртэн сүлүөккэ бааллар: маастарбыт Николай Бугуев, байыастар Альбина Егорова, Зинаида Яковлева, Галина Горохова, Галина Захаркина, Тит Сивцев, Галина Лаптева, Людмила Тарасова, Лидия Васильева, Василий Посельскай. Сорохторун 51 сыл буолан баран саҥа көрдүм. Биһиги «Аргыспытыгар» үлэлээн ааспыт ыччаттартан элбэх биллиилээх дьон үүнэн-үрдээн тахсыбыттара. Кинилэр ортолоругар бааллар  учуонайдар Василий Илларионов, Егор Шишигин, суруйааччылар Егор Неймохов, Василий Васильев — Харысхал, салайар үлэһиттэр Алексей Шишигин, Василий Артемьев, Николай Бугуев, Екатерина Васильева, Вячеслав Окороков, үөрэҕирии туйгуннара Зинаида Яковлева, Варвара Сивцева, Елена Гермогенова, Наталья Слепцова, Людмила Тарасова, Любовь Кузьмина о.д.а. Хомойуох иһин, үгүс доҕотторбут билигин биһиги кэккэбитигэр суохтар…

Устудьуоннар тутар этэрээттэрин бастакы сүлүөтэ ньиргийэн ааста. Бу тэрээһин үтүө үгэскэ кубулуйан, ыытылла туруон наада. Сүүрэн-көтөн сүлүөтү тэрийбит дьоҥҥо, бүгүҥҥү байыастарга махтанабыт, элбэх саҥа идиэйэлэрин олоххо киллэрэн иһэллэригэр баҕарабыт!

Устудьуоннар этэрээттэрэ — бу улахан күүс, бу ыччат романтиката, бу — үлэҕэ, олоххо дьиҥнээх хатарыллыы!

Хаартыскалары: Е.Прокопьева ыытта

Елена Прокопьева/Варламова/ «Аргыс»  этэрээт бэтэрээн байыаһа, РФ суруналыыстарын сойууһун чилиэнэ.