Устудьуоннар этэрээттэрин 500 байыаһа тутуу уонна бырамыысыланнас эбийиэктэригэр үлэлиир

Бу туһунан «Российские студенческие отряды» ыччат уопсастыбаннай тэрилтэтин Саха сиринээҕи салаатын ыстаабын салайааччыта Айсен Соловьев иһитиннэрдэ.

2024 с. сылга сезонугар барыта 5 тыһыынча устудьуон этэрээтин байыаһа үлэлиэҕэ, бу 2023 сыл көрдөрүүтүттэн икки төгүл элбэх.

Ил Дархан Айсен Николаев эрдэ устудьуоннар этэрээттэрэ – өрөспүүбүлүкэ дьиҥнээх киэн туттуута, кинилэр туруоруллубут соруктарын чиэстээхтик толороллорун уонна профессиональнай таһымнара үрдүгүн бэлиэтээбитэ.

«Тутуу этэрээттэрэ Саха сирин инфраструктурнай уонна бырамыысыланнай эбийиэктэри тутууга 500 байыас сылдьар. Үлэ биэрээччилэринэн «Сахатранснефтегаз», «Газпромтрансгаз» Томскай, «Якутуголь», Нерюнгритааҕы ГРЭС, «Колмар», «АЛРОСА», «Энергосеть», «Адгезия», «Сэттэ» СК, «Утум+», «Монтажник» уо.д.а. буолаллар», — диэн кэпсээтэ Айсен Соловьев. Саха сирин сиригэр-уотугар дойду 12 эрэгийиэниттэн 360 байыаһы хабар Бүтүн Арассыыйатааҕы «Север» улахан тутуу ыытыллыа. Сааскы халаан уутун содулларын туоратар үлэҕэ Нам оройуонугар 40 байыас уонна Өлүөхүмэ оройуонугар 10 байыас үлэлии сылдьар.

«Саха сирин ыччата» субсидия чэрчитинэн Орто Халыма, Таатта уонна Бүлүү оройуоннарыгар 35 байыас үлэлиир. 100-тэн тахса байыас өрөспүүбүлүкэ оройуоннарыгар территорияны тупсарыыга сылдьар. 120 байыас М.К. Аммосов аатынан Хотугулуу-илиҥҥи федеральнай университет устудьуоннарын уопсайдарыгар өрөмүөн үлэтигэр кыттар», — диэн кини этэр.

200-тэн тахса байыас суол хаһаайыстыбатын эйгэтигэр, «УпрДорВилюй», «Железные дороги Якутии» уонна Якутдорстрой бэдэрээччит тэрилтэлэргэ үлэлииллэр. М.К. Аммосов аатынан ХИФУ Автодорожнай факультетын 10 байыаһа Татарстан Өрөспүүбүлүкэтигэр «КамАЗ» ААУо-ҕа үлэлииллэр. 250-тан тахса устудьуон Камчатскай кыраай уонна Сахалин уобалаһын собуоттарыгар балыкка үлэлииллэр, 100 байыас дойдуларыгар дьиикэй үүнээйилэри хомуйууга, күрүө тутуутугар, үүнээйини үүннэриигэ уонна да атын үлэлэргэ сылдьаллар.

«Азия оҕолоро» оонньууларга 250 байыас контролер, 308 – сервискэ, 119 – аһыыр сиргэ үлэлээбиттэрэ. 250 байыас баһаатай быһыытынан оҕо лааҕырдарыгар сылдьаллар.
Итини таһынан 800 байыас балыыһаларга, госпиталларга, суудуналарга, о.д.а. үлэлииллэр.