Устудьуоннар куукуланан олоҥхо-испэктээги туруордулар

Күннүк Уурастыырап  «Нуоралдьын кугас аттаах Тойон Дьаҕарыма Бухатыыр» олоҥхотун Арктикатааҕы култуура, ускуустуба институтун устудьуоннара тыыннаах доҕуһуолунан туруордулар.

Кэрэхсэбиллээҕэ диэн, кырачааннар бэркэ сэргээн көрөллөр эбит. Тэҥҥэ кэпсэтэ, күлэ-үөрэ олороллор. Абааһы кыыла тахсыбытыгар куттаннылар. »Ол баар, кэннигэр турар!» диэн ыйан биэрэллэр. »Тоҕо итинник гыннылар?» диэн ийэлэриттэн ыйыталлар.
Бу »Тойон Дьаҕарыма Бухатыыр» олоҥхону быйылгы ыһыахха үс айар кэлэктиип — Олоҥхо тыйаатыра, Алтаннааҕы култуура киинэ уонна бу, АГИКИ устудьуоннара туруордулар.
Кырачааннарга эмиэ болҕомто ууран, олоҥхоҕо сыһыарбыттара кэрэхсэбиллээх.
Устудьуоннар куукулаларын бэйэлэрэ оҥорбуттар. Бэркэ хамсатан, туойан, олоҥхолууллар. Ону тэҥэ, хомуһунан, кырыымпанан, күпсүүрүнэн доҕуһуоллаабыттара уратытын көһүннэ.