Устудьуоннар мас-рестлиҥҥэ Бүтүн Арассыыйатааҕы турнирга кыттыахтара

ХИФУ, ЧГИФКиС уонна АГАТУ хамаандалара Уфа куоракка устудьуоннарга аналлаах мас-рестлиҥҥэ Бүтүн Арассыыйатааҕы турнирга кытта барыахтара. Күрэхтэһии сэтинньи 28-29 күннэригэр ыытыллыаҕа, диэн ЯСИА иһитиннэрэр.

Күрэхтэһии тус уонна хамаанданан киирсии быһыытынан ыытыллар, онон ыйааһыннарынан кыайыылаахтары таһынан, бастыҥ хамаанда эмиэ быһаарыллыаҕа.

«Хотугу-Илиҥҥи федеральнай университетан 15 күрэсчит кыттыаҕа, Чурапчытааҕы судаарыстыбаннай институт сэттэ киһини сайаапкалаата, оттон Арктикатааҕы судаарыстыбаннай агротехнологическай университет — уон күрэсчити. Дойду киин эрэгийиэннэриттэн элбэх күрэсчит кэлэрэ күүтүллэр», — диэн Саха сирин сүүмэрдэммит хамаандатын тириэньэрдэр ыстаабыгар кэпсээтилэр.

Бүгүҥҥү күҥҥэ кыттааччылартан саамай ааттаах-суоллаахтарынан ХИФУ хамаандатыттан Семен Борисов — быйылгы сыл аан дойду чөмпүйэнээтин уонна Манчаары оонньууларын кыайыылааҕа ааҕыллар. Хамаандалартан 17-тэн 25-гэр диэри саастаах устудьуоннар кыттыахтарын сөп.

60, 70, 80, 90, 105 кг диэри уонна 105 кг үөһэ ыйааһыннаах юниордар, ону таһынан 50, 60, 70, 80 кг диэри уонна 80 кг үөһэ ыйааһыннаах юниоркалар киирсиэхтэрэ.

• АГАТУ сүүмэрдэммит хамаандатын састааба: Айтал Кириллин, Айсен Пермяков (60 кг), Иван Васильев, Андрей Стручков (70 кг), Иван Ушницкий, Иннокентий Корякин (80 кг), Владислав Софронов (105 кг), Лия Дмитриева (50 кг), Жанна Алексеева, Мира Неустроева (60 кг).
• ХИФУ сүүмэрдэммит хамаандатын састааба: Дьулус Андреев (60 кг), Ким Иванов (70 кг), Егор Сивцев (80 кг), Максим Алексанов (80 кг), Семен Борисов (90 кг), Артём Одилбеков (90 кг), Анатолий Тимофеев (105 кг), Денис Федоров, Айтал Винокуров (105+ кг), Арина Старостина (50 кг), Инесса Адамова (60 кг), Алина Бурнашева (70 кг), Элеонора Ксенофонтова (70 кг), Мира Павлова (80 кг), Валерия Никифорова (80+ кг).
• ЧГИФКиС сүүмэрдэммит хамаандатын састааба: Айастаан Аржаков, Максим Иовлев, Эрик Пермяков, Кирилл Няч, Саяна Спиридонова, Виктория Алексеева, Вера Чичигинарова.