Устудьуоннар тутар этэрээттэрэ улахан эбийиэктэри тутууга кыттыахтара

Устудьуоннар тутар этэрээттэрэ Уһук Илин уонна Арктика зонатын территорияларыгар инфраструктура эбийиэктэрин тутууга кыттыахтарын сөп буолла.

Ол курдук, «Обеспечение доступным и комфортным жильем и коммунальными услугами граждан Российской Федерации» диэн судаарыстыбаннай бырагыраамаҕа уларытыылары киллэрдилэр. Судаарыстыбаннай бырагырааманан Уһук Илиҥҥэ уонна Арктикаҕа инфраструктура эбийиэктэрин тутууга  устудьуоннар тутар этэрээттэрин тардыыга сыл ахсын үп-харчы көрүллэр буолуоҕа. Бу устудьуоннар идэлэрин таһымнарын үрдэтиигэ, үлэ бастакы уопутун ылалларыгар кыах биэриэҕэ.

Устудьуоннар этэрээттэрэ бу кэмтэн ыла социальнай, тырааныспар уонна инженернэй инфраструктура эбийиэктэрин тутууга уонна куорат эйгэтин тупсарыыга бырайыактары олоххо киллэриигэ кыттыахтара. Бу сыалга үбүлээһин «Обеспечение доступным и комфортным жильем и коммунальными услугами граждан Российской Федерации» судаарыстыбаннай бырагыраама чэрчитинэн ыытыллыаҕа.

Санатан эттэххэ, Уһук Илиҥҥэ  устудьуоннар этэрээттэрин сыллата тардыыга наадалаах үп-харчы аныырга дойду Бэрэсидьиэнэ В.В. Путин Уһук Илин уокурук сайдыытын боппуруостарыгар уопсастыбаннас бэрэстэбиитэллэрин кытары көрсүһүү түмүгүнэн сорудахтаабыта. Итини кытта маннык көрдөһүүлээх Бүтүн Арассыыйатааҕы «Россия устудьуоннарын этэрээттэрэ» ыччат уопсастыбаннай тэрилтэтин бэрэстэбиитэллэрэ этии киллэрбиттэрэ.