Устудьуоннарга аналлаах тэрээһиннэр билиини иҥэрэллэр

Быйыл кулун тутар 3 күнүгэр төрүттэммитэ 55 сылын туолар «Таммахтар» литературнай холбоһук (Мэҥэ Хаҥалас), Иннокентий Сосин аатынан Майатааҕы киин бибилэтиэкэ итиэннэ ХИФУ научнай бибилэтиэкэтэ олохтон туораабыт суруйааччылар ааттарын үйэтитиигэ  бэһис сылын устудьуоннарга анаан  үлэлэһэн кэллилэр.

Олунньу 4 күнүгэр «Таммахтар» литературнай холбоһугу 18 сыл салайбыт, суруйааччы, суруналыыс Иван Афанасьевич  Сысолятин 90 сылынан бу тэрээһиҥҥэ Сыымахтан биир дойдулаахтара, аймахтара аат ааттаан кэлэн көрсүһүүбүтүн өссө үрдэттилэр.
Манна 4 паара кэнниттэн тута кэлбит устудьуоннар бэрт элбэҕи билэн-көрөн, бэйиэт хоһооннорун доргуччу ааҕыыга кыттыһан, эбиитин кинилэргэ анаан Сыымахтан аҕалыллыбыт сахалыы астаах сандалыга тото-хана аһаан, дуоһуйан, махтанан, тарҕастылар.

Түмүккэ Баатара нэһилиэгин баһылыгын солбуйааччы Альбина Николаевна Захарова  кыттыбыт уонна тэрийэн ыыппыт дьоҥҥо барҕа махталын биллэрдэ итиэннэ эдэр ыччаты кытта маннык таһымнаах, көдьүүстээх үлэ салҕана туруохтун диэн алгыһын анаата.

Августина ВЛАДИМИРОВА-ХАБАРОВА