Устудьуоннарга ураты уруоктар

Дьокуускайдааҕы сервис технологическай тиэхиньикумун  уонна мэдиссиинэ кэллиэһин устудьуоннара байыаннай дьайыы кыттыылаахтарын уонна бойобуой дьайыылар бэтэрээннэрин кытары көрүстүлэр.

Устудьуоннарга ыалдьыттар байыаннай дьайыы туһунан, ону сэргэ өйөбүл суолтатын кэпсээтилэр.

Мустубут дьон бойобуой дьайыылар бэтэрээннэрин ассоциациятын бэрэссэдээтэлин, «Боотур» добровольческай этэрээт салайааччытын Иван Черкашины болҕойон иһиттилэр. Кини байыаннай дьайыы тиэмэтигэр аһаҕас уонна чиэһинэй кэпсэтии суолтатын бэлиэтээтэ.

—Биһиги аһаҕастык уонна чиэһинэйдик, кырдьыгынан кэпсэтэр буоллахпытына, бэйэ-бэйэбитин өйдөһүөхпүт, түмсүүлээх буолуохпут. Оскуолаҕа үөрэнэ сылдьан, бойобуой дьайыыга кыттыам диэн санаабат этим. Киһи буойун буолан төрөөбөт, оннук буолар. Итиэннэ дьиҥнээх дьоруойдары хас хардыыбыт аайы көрсүөхпүтүн сөп, кинилэр биһиги барыбыт аттыбытыгар сылдьаллар, бааллар. Эйэлээх кэмҥэ дьоруой буолар уустук уонна бочуоттаах, — диир Черкашин.

Маны сэргэ, дойдуга бэриниилээх буолуу, төрөөбүт сирин-уотун таптыыр көлүөнэни иитии туһунан кэпсэттилэр.

Санатан эттэххэ, Саха сирин оскуолаларын үөрэнээччилэрэ РФ Бэрэсидьиэнигэр Владимир Путиҥҥа үөрэх кыһаларыгар маннык уруоктары бойобуой дьайыы бэтэрээннэрэ, ол иһигэр байыаннай дьайыы кыттыылаахтара ыытыахтаахтарын туһунан суруйан тураллар.