Устудьуоннары бу күннэргэ уопсайга киллэриэхтэрэ

Быйыл устудьуон аатын сүкпүт оҕолор уопсайга киирии кэмин долгуйа кэтэһэллэр. М.К.Аммосов аатынан Хотугулуу-Илиҥҥи федеральнай университет ректора Анатолий Николаев пресс-кэмпириэнсийэҕэ иһитиннэрбитинэн, устудьуоннары уопсайга бу күннэргэ киллэртиэхтэрэ.  

Хотугулуу-Илиҥҥи федеральнай университекка бүгүҥҥү туругунан 5019 киһи үөрэххэ киирбит. “Быйыл “Азия оҕолоро” оонньууларынан сибээстээн, уопсайдарбыт хаһааҥҥытааҕар даҕаны эрдэ – бэс ыйын 15 күнүгэр номнуо бэлэмнэммиттэрэ. Туһааннаах уорганнар уотугар-күөһүгэр, кыра бээтинэтигэр тиийэ бэрэбиэркэлээбиттэрэ.

Сыллата 1600 курдук миэстэни бастакы куурус устудьуоннарыгар көрөбүт. Күн бүгүн 1700-1800 сайабылыанньаны ыллыбыт. Бүгүн (атырдьах ыйын 27 күнүгэр, аапт.) сайабылыанньалары көрүү мунньаҕа буолуохтаах итиэннэ атырдьах ыйын 28-29 күнүттэн уопсайдарга устудьуоннары номнуо киллэриэхтээхтэр. Кэлиҥҥи сылларга балаҕан ыйын 1 күнүгэр диэри киллэрэн саҕалыыбыт”, – диэн ректор Анатолий Николаев пресс-кэмпириэнсийэ кэмигэр эттэ.

Ыйдааҕы төлөбүр 1200 солк. курдук диэн иһитиннэрдэ. “Федеральнай норматив итинтэн ордук үрдэттэрбэт. Дьиҥэр, биир куойка миэстэни көрүү-истии, тутуу (содержание) былырыын 3,5-4,5 тыһ. солк. тэҥнэһэрэ”, – диэн ректор быһаарар.

Билигин биир хостоох кыбартыыраны куортамнаһыы 30-40 тыһ. солк. тэҥнэһэр. Онно холоотоххо 1200 солк. кэппиэйкэҕэ тэҥнээх.  Ол эрээри, өрүү буоларын курдук, уопсайга миэстэ тиийбэт. Бастатан туран, тулаайах, ыраах улуустан сылдьар, кыра дохуоттаах, анал байыаннай дьайыы кыттыылаахтарын оҕолорун ылар соруктаахтар.