Устудьуонтан харчыны күһэйэн ылыыга уорбаланааччы хаайылынна

Техникум устудьуонуттан харчыны күһэйэн ылыыга уорбаланар сааһын ситэ илик уол  хаайылынна. Мэҥэ Хаҥалас улууһугар баар техникумҥа үөрэнэ сылдьыбыт  17 саастаах уол  РФ Холуобунай кодексын 163 ыст. 3 ч. (вымогательство, совершенное с причинением тяжкого вреда здоровью потерпевшего) буруйданар. 

Холуобунай дьыала матырыйаалларынан, 2025 сыл алтынньытыгар  уорбаланааччы  техникум уопсайыгар  туһааннаах үөрэх кыһатын үөрэнээччититтэн  30 тыһ. солк. биэрэригэр модьуйбут.  Итиэннэ эмсэҕэлээччини кырбаабыт. Ол түмүгэр уол улахан эчэйиини ылан балыыһаҕа киллэриллибит.

Быһылаан тахсыбытын кэннэ уорбаланааччыны үөрэҕиттэн устубуттар.  Ол кэннэ уол  Дьокуускайга кэлбит.  Эмсэҕэлээччи полицияҕа тыллаабытын кэннэ, уорбаланааччыны туппуттар.

Буруйдаах  урут ыар  буруйу оҥорон холуобунай эппиэтинэскэ тардылла сылдьыбытын  учуоттаан, силиэдэбэтэллэр  этиилэринэн уонна суут быһаарыытынан силиэстийэ кэмигэр буруйдааҕы  хаайбыттар (под стражу).