Усуйаана Туматыгар «Битва шефов» ыытылынна

Усуйаана улууһун Тумат нэһилиэгэр олус сэргэхтик олороллор. Бу сотрутааҕыта «Түмсүү» култуура дьиэтигэр асчыттарга аналлаах «Битва шефов» куонкурус ыытыллыбыт. Бу туһунан Тумат олохтооҕо, кулууп дириэктэрэ Андриан Горохов иһитиннэрдэ.

Тэрээһин Ийэ күнүн көрсө ыытыллыбыт. Манна ийэлэр оҕолорун кытта ас астаан бар дьону сөхтөрбүттэр. Розалия Барабанская кыыһа Раялыын, Туяра Бубякина кыыһа Тиналыын, Матрена Томская кыыһа Юрияналыын уонна Людмила Емельянова уола Колялыын кыттыбыттар. Дьүүллүүр сүбэ бэрэссэдээтэлинэн култуура дьиэтин дириэктэрэ Андриан Горохов буолбут. Ону сэргэ дьүүллүүр сүбэ чилиэттэринэн нэһилиэк тутаах дьоно — доруобуйа харыстабылын бэтэрээнэ Ульяна Слепцова, «Тугутчаан» уһуйаан хаһаайыстыбаннай чааһын сэбиэдэссэйэ Юлия Горохова уонна урбаанньыт Юлия Томская буолбуттар.

Күөн көрсүү биэс түһүмэҕинэн ааспыт. Бастакы түһүмэххэ ийэлэр астаан аҕалбыт туортарын киэргэппиттэр. Иккис түһүмэххэ смузи оҥорбуттар, үһүс түһүмэххэ блины астаабыттар. Түмүккэ кыайыылаах аатын Матрена Томская ылбыт. Иккис миэстэ Людмила Емельянова,  үһүскэ Туяра Бубякина уонна биһирэбил бириискэ Розалия Барабанская тиксибиттэр.