Усуйаана улууһугар булуллубут кыталык оҕотун “Орто Дойду” зоопаркаҕа аҕалыахтара

Балаҕан ыйын бүтүүтэ, тыйыс айылҕалаах Усуйаана улууһугар киһи дууһатын таарыйар түгэн буолбута – олохтоохтор Кыһыл Кинигэҕэ киллэриллибит сэдэх көтөр, соҕотох сылдьар кыталык оҕотун булбуттара.

Кынаттаах тулаайах дьылҕатын туһунан аан маҥнай “Удьуор” родовой община баһылыга Сергей Филиппов кыһаллыбыт, көтөр оҕотун бэйэтигэр ылан исписэлиистэргэ биллэрбит.

Кыталык  оҕотун Хаһааччыйа сэлиэнньэтиттэн сүүһүнэн килэмиэтирдээх сиргэ булуохтарыттан ыла, көтөрү быыһыыр туһугар элбэх киһи сыратын уурбут. Кыһыл Кинигэҕэ киирбит көтөрү быыһыыр туһугар Экология министиэристибэтин, “Орто Дойду” зоопарка, биоресурса дириэксийэтин исписэлиистэрэ Сергейгэ сүбэ-ама биэрбиттэр, өйөөбүттэр.

Орнитологтар этэллэринэн, көтөр оҕото күүстээх тыал кэмигэр төрөппүттэриттэн хаалбыт буолуон сөп. Кыталык оҕотун туһугар кыһанар-мүһэнэр көтөр быһыытынан биллэр, баҕар, төрөппүттэрэ өлбүттэрэ буолуо диэн сабаҕалыыллар. “Көтөрдөр ити курдук арахсан баран, дьолго, булсубут түгэннэрэ бааллар” – диэн Дириэксийэ салайааччытын солбуйааччы Саргылана Михайлова бэлиэтиир.

Билигин көтөрү кичэйэн көрөллөр-истэллэр. Олохтоох бэтэринээр этэринэн, төһө даҕаны уустуктары көрсүбүтүн иһин, көтөр билигин туруга үчүгэй.

Күн бүгүн экологтар кыталык оҕотун куттала суох Дьокуускайга аҕалар туһунан толкуйдууллар, зоопарка исписэлиистэрэ номнуо кэтэһэллэр. Бу туһунан Заповедная Якутия телеграм-ханаалга суруйаллар.