Усуйаанаҕа эр киһи өлбүт аҕатын биэнсийэтин туһана сылдьыбыт

Усуйаана оройуонун суута Белая Гора бөһүөлэгин олохтооҕун буруйдааҕынан билиннэ.

Эр киһи сыл аҥаарын устата өлбүт аҕатын биэнсийэтин төлөбүрүн туһаммыт. Бу туһунан Саха сирин холбоһуктаах сууттарын пресс-сулууспата иһитиннэрэр.

Суут быһаарбытынан, 2023 сыл от ыйыгар буруйдаах өлбүт аҕатын мобильнай төлөпүөнүгэр биэнсийэ төлөбүрэ түспүтүн туһунан СМС кэлбит. Эр киһи киирбит харчыны кистээн туһанарга быһаарыммыт.

Ол курдук, хара санаалаах 2023 сыл от ыйыттан ахсынньыга диэри өлбүт аҕатын биэнсийэтин төлөбүрүн туһана сылдьыбыт. Кини дьайыытын түмүгэр Социальнай пуонда отделениетыгар 192 тыһыынчаттан тахса суумаҕа хоромньу тахсыбыт. Суут эр киһини 2 сыл уонна 6 ый усулуобунайдык көҥүлүн быһарга уураахтаата. Суут кэмигэр эр киһи буруйун толору билиммит.