Усуйааналар сонун тэрээһинтэн сэргэхсийдилэр

Хаһааччыйаҕа «Сайдыы» култуура дьиэтигэр «Сүрэхпит сылааһа ийэҕэ» диэн эҕэрдэ кэнсиэр уратытык саҕаланна.

Талба талааннаах, ураты көрүүлээх, уран тарбахтаах, түөрт оҕо күн күбэй ийэтэ Евдокия Никитична Филиппова тобуллаҕас толкуйунан мындырдаан айбыт, уран илиитинэн тикпит, оһуордаабыт-мандардаабыт саха, эбээн омук киэргэллэрин дьон-сэргэ көрүүтүгэр, сыанабылыгар таһаарда.

Евдокия Никитична нэһилиэк киэн туттар киһитэ. Бу дьоро киэһээ кини уустаан-ураннаан тикпит дьэрэкээн кустук өҥүнэн оонньуур бастыҥаларын, илин кэбиһэрдэрин, түөскэ иилинэр киэргэллэрин, хаппардары, аныгылыы моһуоннаах баттах киэргэллэрин, ытарҕалары, брелоктары дьон-сэргэ сэҥээрэ, сэргии көрдүлэр.

Нарын, кэрэчээн сибэкки кыргыттартан саҕалаан аҕам саастаах далбар хотуттарыгар тиийэ ытык ийэ уустаан-ураннаан, оһуордаан-мандардаан оҥорбут ураты киэргэллэрин кэтэн, симэнэн муусука тыаһыгар уйдаран хаамыстылар, сыананы киэргэттилэр. Тэрээһин саҕаланыаҕыттан ытыс тыаһынан арыалланна. Дьон-сэргэ астына-дуоһуйа сынньанна.

Елена Горохова,

Хаһааччыйа, Усуйаана.

Хаартыскалар Ирина Ючюгяева тиксэриилэрэ