Уу кэлиитинэн сибээстээн өрөспүүбүлүкэ сорох суолларынан айан-сырыы уустугурда

Федеральнай уонна өрөспүүбүлүкэ суолларын кэккэ учаастактарынан уу таһыма тахсан, сырыы уустуктардааҕын туһунан Тырааныспар уонна суол хаһаайыстыбатын миниистирэ Владимир Сивцев иһитиннэрдэ.  

Кини этэринэн, Үөһээ Бүлүү улууһугар “Бүлүү” федеральнай суол 660-с уонна 665-с килэмиэтиригэр уу таһыма тахсыбыта, ол иһигэр, Бүлүүтээҕи ГЭС ууну ыытыытын түмүгэр бэлиэтэммит.

“Бу Үөһээ Бүлүү сэлиэнньэтин чугаһыгар Бүлүү өрүскэ паром тиксэр сирин уларыйыытыгар төрүөтүнэн буолар. Билиҥҥитэ онно үс паром сылдьар, ол эрээри, икки тиксии икки арда улаатан биэрдэ, онон харгыстар үөскээтилэр. Бу күннэргэ бэдэрээтчиттэр киирэр суолу оҥорууга ылсыахтара. Уу таһыма түһэрэ күүтүлэр, ол кэнниттэн “Бүлүү” федеральнай суолу чөлүгэр түһэрии саҕаланыаҕа” – диэн миниистир этэр.

“Халыма” федеральнай трассаҕа Харбала-2 (Чурапчы улууһа) уонна Кыйы (Таатта улууһа) сэлиэнньэлэрин икки ардыларыгар 200-202 км айан уустугурда.

“Хомойуох иһин, бырамыысыланнай уонна тутар тэрилтэлэр көҥүллэнэр ыйааһынтан ордук уйуктаах таһаҕаһы таһаллар. Ол курдук, ааспыт өрөбүллэргэ 70 туонналаах массыыналар суол арҕаһын дьөлүтэ үктээн кэбистилэр. Онон сырыы уустугурбута. Ити учаастакка эбии өрөмүөн үлэлэрэ ыытыллыахтара. Итини таһынан, биирдилээн учаастактарга хапытаалынай өрөмүөн ыытыллар, 2026 сылга бүтэрэ былааннанар” – диэн Сивцев бэлиэтиир.

Уус Маайа улууһугар “Амма” эрэгийиэн таһымнаах суолга уу тахсан, ууга барбыт учаастактар бааллар – Элдьикээн уонна Солнечнай, ону тэҥэ, Уус Маайа уонна Петропавловскай сэлиэнньэлэрин икки ардыларыгар.

Уу эбийиэктэригэр буруйу оҥорууну уонна быһылааны тахсыытын сэрэтэр, туоратар сыалтан, барыбыттан болҕомтолоох буолуу ирдэнэр. Уу эбийиэктэригэр куттал суох буолуута – биһиги барыбыт уопсай эппиэтинэспит. Бэйэбит уонна чугас дьоммут олохторун, доруобуйаларын харыстыыр туһугар, бары ирдэбиллэри тутуһан, сэрэхтээх буолуоҕуҥ! Этэҥҥэ сылдьыҥ!

Бу туһунан Ил Дархан уонна Бырабыыталыстыба пресс-сулууспата суруйар. Салгыы манна ааҕыҥ.