Уу ситимин тардыы, суол кыһалҕата…

Амма улууһун Сулҕаччытыгар чугастааҕы Сэргэ Бэс учаастагы кытары 750 кэриҥэ киһи олорор. Бырабыыталыстыба отчуотугар 60-тан тахса киһи кэлбит.

Сулҕаччыга суол боппуруоһун күүскэ туруорустулар. Сулҕаччы-Мындаҕаайы суола оҥоһулларын, Бөтүҥ суолун өрөмүөнэ хаһан бүтэрин, муоста алдьаммыта хаһан тутулларын ыйыталлар. Суол сыл аайы кыралаан оҥоһуллар, алдьаммыт муостаны хамыыһыйа кэлэн көрөн, ааҕан-суоттаан барда, бу саас оҥоһуллуохтаах.
Маны тэҥэ, экология, ойууру чөлүгэр түһэрии, социальнай гаастааһын, өртөөһүн, ардаҕы түһэрии, о.д.а. боппуруостары туруордулар.

»Иһэр уубут кирдээх, анаалыһа ирдэбилгэ эппиэттээбэт. Өрүспүт тэйиччи сытар. Уонча сыллааҕыта скважина үүттэммитэ. Ону дьиэлэргэ тиэрдии кыаллыа дуо?» диэн ыйыттылар.
Билигин Амма улууһугар »Иһэр уу» федеральнай бырагыраама Алтан, Амма сэлиэнньэлэригэр үлэлиэҕэ. Бу кэнниттэн Сатаҕай, Алтан, Эмис сэлиэнньэлэрин уочараттара кэлиэхтээх. Сулҕаччы скважинатын уута минераллаах буолан, иһэр табыллыбат. ОДьКХ миниистирин солбуйааччы, ОДьКХ кылаабынай инженерэ Александр Корякин этэринэн, ууну ыраастыыр тэрили булан, туруоруохтарын сөп эрээри, нэһилиэк, чааһынай дьон турба буларга, о.д.а. кыттыһыахтарын наада. Оттон федеральнай бырагыраамаҕа киирсэргэ бырайыак баара ирдэнэр.

Нэһилиэнньэ 80%-на киин ититии ситимигэр холбонон олорор. Хаалбыт 20%-ны холбуурга хочуолунай кыамтата тиийбэт. Оттор мас кырыымчык. Сулҕаччылар саҥа оскуоланы эмиэ туруорсаллар, бу кыалыннаҕына, иккис хочуолунайы тэҥинэн туттахтарына, хаалбыт дьон ититиигэ холбонуохтарын сөп.
Аптека суоҕа үгүс кыһалҕалары үөскэтэрин эттилэр. Улуус баһылыга Степан Кузьмин Сатаҕай, Болугур нэһилиэктэрин холобур аҕалла. Ол курдук, нэһилиэк баһылыга, оройуоннааҕы киин балыыһа уонна чааһынай аптека сөбүлэһии түһэрсэн, нэһилиэккэ аптека филиалын арыйыахтарын сөп.

Маны тэҥэ, Амма төрдүгэр мас кэрдиитин ыйыттылар. Манна бөлөх салайааччыта, экэниэмикэ миниистирэ Майя Данилова маннык хоруйдаата:
— 2021 сыллаахха »Ангара» тэрилтэ 34 га сиргэ маһы кэрдэргэ декларация биэрбитэ. Декларация биир сылга бэриллэр. 2024 сылга декларацияларын түһэрбэтэхтэр. »Вудленд» тэрилтэ декларациятын эмиэ киллэрбэтэх. Онон 2024 сылга маһы кэрдии ыытыллыбат. Киэҥ уопсастыбаннай кэпсэтии тахсан, тохтообуттар диэн этиэххэ наада.
»Ыттарга сылга төһө үп көрүллэрий? Оттон оҕо аһылыгар төһө үп буоларый?» диэн ыйытыы киирбит. Ыттары көрүүгэ 60 мөлүйүөн солкуобай, оҕо аһылыгар 1 миллиард 170 мөлүйүөн солкуобай көрүллэр. Онон балары тэҥниир табыллыбат.