Уу суолунан дьону таһыыга тарыып үрдээтэ дуо?

Өрөспүүбүлүкэ өрүстэринэн айан-сырыы саҕаланан, пассажирдары таһыыга теплоходтар, дьоҕус суудуналар үлэлээн эрэллэр. Өрүс нөҥүө хантан, ханнык суудуналарынан уонна хас солкуобайга айанныахха сөбүн бу ыстатыйаҕа ааҕыҥ.

СӨ Тырааныспарын уонна суол хаһаайыстыбатын министиэристибэтэ иһитиннэрбитинэн, бүгүҥҥү туругунан Дьокуускай – Аллараа Бэстээх хайысхатынан дьону нөҥүө кытылга туоратыыга 21 суудуна үлэлиир. Киин куораттан икки сиринэн Аллараа Бэстээххэ диэри тиийиэххэ сөп.

“НЕПТУН”

Дьокуускай куорат 203 микрооройуонуттан Аллараа Бэстээххэ диэри сымнаҕас сыттыктаах “Нептун” суудуналар дьону таһаллар. Билиэт сыаната – 500 солкуобай. Сэрии, тыыл, үлэ бэтэрээннэригэр, бойобуой дьайыы кыттыылаахтарыгар, элбэх оҕолоохторго уонна устудьуоннарга – 350 солкуобай. Биэс саастарыгар диэри оҕолорго – босхо.

Дьокуускайтан Аллараа Бэстээххэ диэри 20 мүнүүтэнэн тиийиллэр. Рейстэри оҥорор “Ленатурфлот” хампаанньа иһитиннэрбитинэн, өрүскэ икки суудуна үлэлиир буоллаҕына, дьону чаас аҥаара буола-буола таһаллар. Оттон биир суудуна үлэлиир түгэнигэр чааска биирдэ эрэ усталлар. Бастакы рейстэр сарсыарда 9 чаастан оҥоһуллаллар. Онтон киэһэ 18:30 чаастан үлэлээн бүтэллэр. Суудуналар күн аайы, өрөбүлэ суох үлэлииллэр.

“Бэйэм 202 микрооро­йуоҥҥа олорор буолламмын, сыл ахсын “Нептун” суудуналарынан дьоммор Мэҥэ Хаҥаласка тахсабын. Дьиэбиттэн чугас, айана түргэн уонна куттала суох буолан куруутун туһанабын. Ол гынан баран, былырыын бириэмэнэн үлэлиир эбит буоллахтарына, билигин миэстэ барыта туоллаҕына эрэ барар буолбуттар. Онон кыратык табыгаһа суох буолла”, — диэн куорат олох­тооҕо Валентина Семенова кэпсээтэ.

ДЬОҔУС СУУДУНА

Дьокуускайдааҕы өрүс пуор­дуттан сарсыарда 7.00 чаастан киэһэ 20.00 чааска диэри “Ленаводсервис” хампаанньа түргэн сырыылаах дьоҕус суудуналара Аллараа Бэстээххэ диэри дьону таһаллар. Билиэт сыаната – 500 солкуобай. Социальнай тарыып диэн суох.

Куораттан суудуналар өрүс пуордун төрдүс причалыттан бараллар, оттон Аллараа Бэстээхтэн бастакы бириистэниттэн. Суудуналар эмиэ күн аайы, өрөбүлэ суох үлэлииллэр.

Хампаанньа үлэһиттэрэ бэлиэтээбиттэринэн, суудуналар туоллахтарын аайы баран иһэллэр. Айан бириэмэтэ – 20-30 мүнүүтэ.

“Ыам ыйын бүтүүтүттэн дьоҕус суудуналарынан дьону таһан саҕалаабыппыт. Билигин кэлэр-барар киһи элбэх, онон туоллахпыт аайы айан­наан иһэбит. Билигин өрүскэ хас даҕаны суудуна сылдьар”, – диэн суудуна суоппара Иван кэпсээтэ.

«РУКАВИШНИКОВ» ТЕПЛОХОД

Бэс ыйын 2 күнүттэн, «Рукавишников» теплоход үлэтин саҕалаата. Суудуна Дьокуускайтан өрүс пуордуттан үһүс бириистэнтэн, оттон Аллараа Бэстээхтэн өрүс вокзалыттан устар. Билиэт сыаната – 300 солкуобай. Биэс саастарыгар диэри оҕолорго – босхо, 5-10 саастаах оҕолорго – 150 солкуобай. Рейстэр араспысаанньалара: Дьокуускайтан 9.00, 14:30 уонна 16:00 чаастан айанныыр. Оттон Аллараа Бэстээхтэн 10:45, 16:00 уонна киэһээ 20:00 устар. Тимир суолунан айаннааччылар «РЖД» ААУо саайтыттан тута теплоход билиэтин атыылаһыахтарын сөп.

АТЫН ХАЙЫСХАЛАРГА

Ону таһынан, бэс ыйыттан Дьокуускай – Өлүөхүмэ уонна Дьокуускай – Сангаар хайысханан түргэн сырыылаах «Валдай-45Р», “Восход” уонна “Метеор” ааллар дьону таһан саҕалаатылар.
Дьокуускай – Өлүөхүмэ хайысханан сырыы бэс ыйын 3 күнүттэн балаҕан ыйын 30 күнүгэр диэри оҥоһуллар. Суудуналар күн аайы сылдьаллар. Билиэт сыаната 12 370 солкуобай, 5-10 саастаах оҕолорго – 6185 солкуобай, биэстэриттэн кыра оҕолорго – босхо.

Киин куораттан Сангаарга диэри “Ракета”, “Восход” уонна “Метеор суудуналар балаҕан ыйын 30 күнүгэр диэри сылдьаллар. Дьокуускайтан ааллар ый ахсын чорбохтоох чыыһылаларга бараллар, оттон Сангаартан – чорбоҕо суох. Тарыып – 4450 солкуобай, 5-10 саастаах оҕолорго – 2250 солк., биэстэригэр диэри оҕолорго эмиэ босхо.

Бэс ыйын 20 күнүттэн алтынньы 6 күнүгэр диэри Дьокуускай – Эдьигээн хайысханан “Восход” уонна “Ракета” сырыылара аһыллара бы­­лааннанар. Киин куораттан ый ахсын 20 чыыһылаҕа турунар, оттон Эдьигээнтэн – 21 чыыһылаҕа. Тарыып: улахан дьоҥҥо – 10 170 солк., 5-10 саастаах оҕолорго – 5 085 солкуобай.

Билиэттэр өрүс пуор­дун каассатыгар уонна “Ленатурфлот” хампаанньа саайтыгар онлайн атыыланаллар.