Ууга түспүт массыынаҕа дьон өлбүтүнэн холуобунай дьыала тэрилиннэ

Саха сиринээҕи Силиэстийэлиир кэмитиэтэ Өлүөнэ өрүскэ буолбут алдьархайынан — «куттал суох буолуутун ирдэбиллэригэр эппиэттээбэт өҥөнү оҥоруу, сэрэҕэ суохтан икки киһи өлүүтүгэр тиэрдибит» диэн ыстатыйанан холуобунай дьыаланы тэрийдэ.

Силиэстийэ дааннайынан, сарсыарда ахсынньы 27 күнүгэр Даркылаах түөлбэҕэ «Toyota Estima» массыына Өлүөнэ өрүһү туоруурга анала суох сиринэн айаннаан иһэн ууга түспүт. Иһитиннэрии быһыытынан, массыына кирдээх ууну тоҕор сиринэн киирбит.

Салоҥҥа сэттэ киһи, ол иһигэр 11 саастаах кыыс оҕо бааллара биллибит. Алта киһи бэйэлэрэ тахсыбыттар, оттон кыыс оҕо массыына иһигэр хаалан өлбүт. Маны таһынан, кытылга кырдьаҕас эр киһи, барыллаан тоҥон, тыына быстыбыт.

Массыыналаахтар Чурапчы сэлиэнньэтигэр айаннаан испиттэр, суоппар дьону таһыыга чааһынай өҥөнү оҥорор эбит. Билигин быһылаан буолбут сиригэр силиэдэбэтэллэр уонна криминалистар үлэлииллэр. Массыына уонна оҕо өлүгэ ууттан таһаарылыннылар. Тыыннаах хаалбыт дьон балыыһаҕа эмтэнэллэр.