Ууга түспүт киһи өлүгүн водолазтар буллулар

Өймөкөөн улууһугар Куйдуһун өрүскэ тимирбит  эр киһи өлүгүн водолазтар буллулар.

Санатан эттэххэ, балаҕан ыйын 28 күнүгэр  Өймөкөөн оройуонун диспетчерскэй сулууспатыгар Куйдуһун өрүскэ эр киһи ууга  түспүтүн туһунан иһитиннэрии киирбит. 1955 сыллаах төрүөх эр киһи сылгы баазатыттан  өрүһүнэн  барбыт уонна тийиэхтээх сиригэр кэлбэтэх. Кинини болдьоспут сирдэригэр уола кэтэспит даҕаны, аҕата биллибэтэх. Ааһан иһэр балыксыттар өрүскэ эргийэн хаалбыт оҥочону көрбүттэрин туһунан эппиттэр. Уола олохтоох дьону кытта оҥочону көрбүт сирдэригэр тиийэн көрдөөн баран, булбатахтар.

Балаҕан ыйын  29  күнүгэр Дьокуускайтан ууга түспүт киһини көрдүү түөрт водолаз айаннаабыта. Бөлөх ыстаарсайа  Дмитрий Асекритов.

Бүгүн, алтынньы 2 күнүгэр, водолазтар сарсыардаттан көрдүүр үлэни ыытаннар,  09.32 ч. эр киһи өлүгүн буланнар, ууттан хостообуттар  диэн  Саха сирин Быыһыыр сулууспата иһитиннэрдэ.