Уулусса устун сүгэлээх сылдьыбыт дьахтар миэрэҕэ тардылынна

Социальнай ситимҥэ  ДПС иниспиэктэрдэрэ уонна сүгэлээх  киһи хаартыскалата тарҕанна. 

СӨ Госавтоиниспиэксийэтэ  иһитиннэрбитинэн, сэтинньи 1 күнүгэр Үөһээ Бүлүү улууһун  Андреевскай сэлиэнньэтигэр ДПС   сотрудниктара дьуһуурустубалыы сылдьан, суол устун сүгэлээх дьахтар хааман иһэрин бэлиэтии көрбүттэр. Полиция үлэһиттэрэ дьахтары  суолтан туоруурга уонна сүгэтин сиргэ быраҕарга эппиттэрин үрдүнэн, дьахтар буолумматах. Онуоха дьон-сэргэ олоҕор уонна доруобуйаларыгар куттал суох буолуутун хааччыйар инниттэн,  полиция сотрудниктара «Полиция туһунан»  федеральнай сокуон ирдэбилигэр олоҕуран, дьахтары тутан дьуһуурунай чааска илдьибиттэр.

Мэдиссиинискэй көрүү түмүгэр биллибитэ, дьахтар арыгы испэтэҕэ быһаарыллыбыт. Ол гынан баран маннык быһыы-майгы сиэргэ баппат.

Билигин дьахтарга  КоАП 19.3 ыст. 1 ч. административнай дьыала тэрилиннэ.