Уулуссаҕа булбут картанан саунаҕа сылдьыбыт, гостиницаҕа сынньаммыт

Дьокуускай куоракка полициялар баан счетуттан харчы уоруу дьыалатын арыйдылар. Саха сиринээҕи ИДьМ пресс-сулууспата суруйарынан дьахтар картатын сүтэрбит, онтон улахан суума харчы уһуллубутун көрбүт.

Силиэстийэ быһаарбытынан эр киһи харчыны «үчүгэйдик» күүлэйдииригэр ороскуоттаабыт.
Дьахтара баан картатын сүтэрбитин тутатына билбэтэх. Онтон харчы уһуллубутун көрөн олус соһуйбут. Биллибэт киһи эрэ маҕаһыыннарынан мал-сал, бородуукта атыыласпыт, саунаҕа сылдьыбыт, гостиницаҕа сынньаммыт. Баан счетуттан барыта 9000 солк. ороскуоттаммыт.

Полицейскайдар түргэнник уорбаланааччыны булбуттар — 48 саастаах эр киһи буолара быһаарыллыбыт. Силиэстийэлээччилэр уорбаланааччы урут эмиэ маннык буруйу оҥоруу иһин сууттана сылдьыбытын быһаарбыттар. Кини уулуссаҕа баан картатын булбутун билиммит уонна атын киһи харчытынан туһанарга быһаарыммыт. «Уоруу» ыстатыйатынан холуобунай дьыала тэрилиннэ.