Уу суолунан 670 тыһ. тахса туонна таһаҕас тиэрдилиннэ

Бүгүн, атырдьах ыйын 28 күнүгэр,  СӨ Бырабыыталыстыбатын Бэрэссэдээтэлин бастакы солбуйааччы Дмитрий Садовников салалтатынан таһаҕаһы тиэйиигэ бырабыыталыстыба хамыыһыйатын мунньаҕа буолан ааста.

Ол курдук, 2025 сылга таһаҕас тиэрдиитин былаана — 1148,4 тыһ. туонна. Навигация саҕаланыаҕыттан өрөспүүбүлүкэ наадатыгар анаан 817,8 тыһыынча туонна, ол эбэтэр былаан 71,2 %-на туолла. 673,9 тыһыынча туонна  тиэрдилиннэ, бу уопсай кээмэйтэн 58,7% тэҥнэһэр. 2024 сылга тэҥнээтэххэ, былааннаммыт кээмэйтэн тиэйиигэ 6,2% уопсай хаалыы бэлиэтэммит, ол аата 100,5 тыһыынча туоннаҕа тэҥнэһэр. Саамай улахан хаалы чоххо — 11,2%, ньиэпкэ — 3,6%,  ньиэп бородууксуйатыгар — 3,3%, социальнай суолталаах ас-үөл бородууксуйатыгар — 6,2% бэлиэтэнэр.

Уу таһыма үрдүк буолан, таһаҕас тиэйиитигэр охсуулаах. Ол курдук, «СӨ ОДьКХ» ГУП наадыйыытыгар «Зырянскай» таас чох руднигыттан Орто Халыма куоратыгар таас чоҕу тиэйиигэ хаалыы бэлиэтэммит. Ону тэҥэ «Теплоэнергосервис» АУо наадатыгар Дьабарыкы Хайа уонна Сангаар таас чох шахталарыттан Алдан өрүс устун таас чоҕу ыытыы бытаарбыт. Хампаанньа салалтата “мантан инньэ таһаҕас тиэрдиитэ тэтимириэҕэ уонна бары былааннаммыт үлэ навигация кэмигэр түмүктэниэҕэ” диэн мэктиэлээтэ. Мунньах түмүгүнэн, хаһаайыстыбаннай субъектарга тыын суолталаах таһаҕаһы тиэйии уонна тиэрдии тэтимин түргэтэтэр эбии миэрэлэри ылыналларыгар сорудахтаатылар.

Сиһилии бу сигэнэн аах: https://www.sakha.gov.ru/news/10756