Уус Алдан быраастара мэдиссиинэ көһө сылдьар комплексынан 18-та сырыттылар

Уус Алдан киин балыыһатын эмчиттэрэ “КАМАЗ” массыына баазатыгар көһө сылдьар мэдиссиинэ комплексынан нэһилиэктэргэ 18-та тиийэ сырыттылар, диэн  Доруобуйа харыстабылын министиэристибэтэ иһитиннэрэр.

“Комплексы биһиэхэ 2021 сыллаахха дойду Бэрэсидьиэнэ Владимир Путин көҕүлээбит “Доруобуйа харыстабыла” национальнай бырайыагынан биэрбиттэрэ. Быйылгыттан бу үлэ “Уһун уонна көхтөөх олох” саҥа национальанй бырайыагынан ыытыллар”, — диэтилэр Уус Алдан балыыһатын эмчиттэрэ.

Бу сылларга тустаах комплекс оройуон уһук нэһилиэктэригэр тиийбитэ. Бу сыл алта ыйыгар 311 диагностика уонна биир итиччэ лабаратыарыйаҕа чинчийии ыытылынна. Ити түмүгэр 27 киһи ыалдьара быһаарылынна.

“Дойдубут Бэрэсидьиэнэ Владимир Владимирович Путин көҕүлээһининэн “Уһуннук, көхтөөхтүк олоруу” национальнай бырайыак олоххо киирэр. Кэнники сылларга оройуоммут балыыһата хас да санитарнай массыынаны уонна көһө сылдьар комплексы ылла. Дьоҕус комплексынан быраастарбыт ыраах сытар нэһилиэктэргэ тиийэллэр. Онон олохтоохтор өрөспүүбүлүкэ бырабыыталыстыбатыгар уонна доруобуйа харыстабылын министиэристибэтигэр уонна Бэрэсидьиэммитигэр өйөбүлүн иһин махтанабыт”, — дэһэллэр олохтоохтор.

“Көһө сылдьар мэдиссиинэ комплексын туһаныы тэйиччи сытар оройуоннар олохтоохторугар мэдиссиинэ көмөтө тиксимтиэ буолуутугар көмөлөһөр. Нэһилиэнньэ олус биһирээтэ, онон бу хайысханы салгыы сайыннарыахпыт”, — диэтэ Доруобуйа харыстабылын миниистирэ Лена Афанасьева.

Саха Өрөспүүбүлүкэтин Ил Дарханын уонна  Бырабыыталыстыбатын пресс-сулууспата