Уус Алдан иистэнньэҥнэрэ байыастарга дронтан хаххалыыр 25 плащ-сиэккэни тигэн ыыттылар

Уус Алдан улууһугар «Швейный патриот» бырайыак кыттыылаахтара байыаннай дьайыы байыастарыттан киирбит сайаапканан икки хонук иһигэр 25 устуука дронтан хаххалыыр плащ-сиэккэни тигэн, ыытарга бэлэмнээтилэр. Бу туһунан улуустааҕы «Мүрү саһарҕата» хаһыат иһитиннэрэр.

Сайаапканы тутаат, иистэнньэҥнэр түргэнник үлэҕэ туруммуттар. Хас биирдии хаххалыыр-сиэккэ ымпыга-чымпыга тутуһуллан, хаачыстыбалаахтык тигиллэн, анал мөһөөччүккэ уурулунна. Ону таһынан, «Илин» маҕаһыын салайааччыта Анна Находкина уолаттарга анаан минньигэс кэһии – кэмпиэт уонна бэчиэнньэ эбии уган биэрдэ.

Улуустааҕы дьахтар сүбэтин салайааччыта Валентина Шадрина көҕүлээһининэн тэриллибит «Швейный патриот» бырайыак иистэнньэҥнэрэ бу курдук ыҥырыыга мэлдьи бэлэмнэрин бигэргэттилэр. «Ыраах сылдьар уолаттарбытыгар биһиги тикпит таҥаспыт дурда-хахха буоллун. Үтүө дьайыынан хас биирдиибит Кыайыыны уһансар, буойуннарга күүс-көмө буолар», – диэн иистэнньэҥнэр санааларын үллэстэллэр.