Уус Алдан Курбуһаҕар Гавриил Бурнашев төрөөбүтэ 90 сылыгар анаммыт декада ыытылынна

Ахсынньы 11-21 күннэригэр Уус Алдан улууһун Н.Н. Окоемов аатынан Курбуһах орто оскуолатыгар РСФСР оскуолаларын бочуоттаах үлэһитэ, Үлэ Кыһыл знамята орден кавалера, Уус Алдан улууһун уонна Курбуһах нэһилиэгин Бочуоттаах олохтооҕо Гавриил Васильевич Бурнашев төрөөбүтэ 90 сылыгар анаммыт декада  үрдүк тэрээһиннээхтик ыытылынна. Уон хонук устатыгар оскуола, Курбуһах нэһилиэгин эрэ иһигэр буолбакка, улуус, өрөспүүбүлүкэ таһымнаах араас хабааннаах тэрээһиннэр ыытылыннылар.

Быйыл аан маҥнай Уус Алдан иһинэн ыытыллыбыт “Кэнчээри ыччат кэскилигэр анаммыт олох” диэн айар үлэ куонкурсугар уопсайа 9 оскуолаттан 50-ча оҕо хоһоон, өйтөн суруйуу, ыстатыйа, учууталга сурук суруйан, уруһуйдаан, хаартыскаҕа түһэрэн кытыннылар.

Ахсынньы 14 күнүгэр үгэс буолбут интегрированнай олимпиада саҥа тыыннанан, өрөспүүбүлүкэ таһымыгар тахсан, куйаар ситимин нөҥүө ыытылынна. Бу олимпиадаҕа тоҕс улуустан, икки куораттан уопсайа 166 оҕо кыттыыны ыллылар, саха, нуучча, аангылыйа тылыгар уонна литературатыгар, историяҕа билиилэрин холонон көрдүлэр.

Тохсус кылаастарга бастакы миэстэни Жиркова Камилла (Маҕарас орто оскуолата, Горнай улууһа), иккис миэстэни Прокопьева Сахаяна (Амма 1 нүөмэрдээх орто оскуолата, Амма улууһа), үһүс миэстэни Дмитриева Айна (Амма 1 нүөмэрдээх орто оскуолата, Амма улууһа) ыллылар.

Онус кылаастарга бастакы миэстэни Аллагузина Каролина (Амма лицея, Амма улууһа), иккис миэстэни Егорова Эмма (Суотту орто оскуолата, Уус Алдан улууһа), үһүс миэстэни Вензель Вероника (Болтоҥо орто оскуолата, Чурапчы улууһа) ыллылар.

11 кылаастарга бастакы миэстэни Карманова Тамара (Мындааба орто оскуолата, Уус Алдан улууһа), иккис миэстэни Яковлева Күннэйэ (Амма лицея, Амма улууһа), үһүс миэстэни Терешкина Марина (Курбуһах орто оскуолата, Уус Алдан улууһа) ыллылар.

Маны таһынан, биирдиилээн предмеккэ чаҕылхай билиини көрдөрбүт оҕолорго анал ааттар иҥэрилиннилэр: нуучча тылыгар — Слепцова Кыыдаана, Сыырдаах орто оскуолатын 10 кылааһын үөрэнээччитэ; саха тылыгар — Барашкова Айысхаана, Чурапчы орто оскуолатын 11 кылааһын үөрэнээччитэ; аангылыйа тылыгар — Ломпорова Элеонора, Мирнэй куорат лицейын 9 кылааһын үөрэнээччитэ; литератураҕа — Архипова Валерия, Адыаччы орто оскуолатын 9 кылааһын үөрэнээччитэ; историяҕа — Архипова Анжелика, Амма лицейын 10 кылааһын үөрэнээччитэ.

Бириистээх миэстэҕэ тиксибит оҕолор дипломнарынан, анал бэлиэлэринэн уонна уу харчынан наҕараадаланнылар. Бу 2005 сылтан ыытыллар олимпиадаҕа сыл аайы харчынан бирииһи Гавриил Васильевич кэргэнэ, методист учуутал, «Учууталлар учууталлара» Пермякова Анна Петровна уонна Гавриил Васильевич үөрэппит оҕолоро Елена Ивановна, Василий Петрович Костроминнар уонна 1968 сыллааҕы выпускниктар туруоран кэллилэр.

Бары кыттыыны ылбыт үөрэнээччилэргэ, кинилэр учууталларыгар, бары спонсордарбытыгар Курбуһах орто оскуолатын коллективын аатыттан барҕа махталбытын тиэрдэбит.

Декада түмүгэр, ахсынньы 21 күнүгэр, Курбуһах орто оскуолатыгар Гавриил Васильевич Бурнашев кэргэнэ, оҕолоро, бииргэ үлэлээбит коллегалара, үөрэнээччилэрэ мустаннар ахтыы киэһэтэ олус истиҥник буолла. Күн бастакы аҥарыгар Уус Алдан улууһун оскуолатын үлэһиттэригэр бырайыактааьынна сүрдээх дириҥ ис хоһоонноох семинар буолла. Мантан салгыы, тэрээһин үөрүүлээх чааһыгар араас күрэхтэр кыайыылаахтарыгар грамоталар, бириистэр туттарылыннылар. Бу киэһэҕэ кыттыбыт дьоннор ирэ-хоро кэпсэтэн, оскуола инники сайдыытын торумнаһан, үөрэн-көтөн тарҕастылар.

Екатерина Аммосова, Ульяна Копырина