Уус Алдан оһуокайыттан ураты тыын

Олунньу 1 күнүгэр Арчы дьиэтигэр  өрөбүллээҕи Оһуокайбыт үрдүк таһымнаахтык ааста. Куоракка олорор уус алданнар тоҕуоруһан кэлэн, бэйэлэрин улуустарын, өбүгэ саҕаттан туппут түөлбэ оһуокайдарын төрүттээтилэр.

Дьокуускай куоракка Уус Алдан түмсүүтүн салалтатыттан Лена Семеновна Заболоцкая, куоракка Уус Алдан улууһун бэрэстэбиитэлэ Алексей Яковлевич Троев, куораттан Ньургуйаана Никитина, культура үлэһитэ Матрена Готовцева, эстрада артыыһа Василий Новоприезжай, Аар Дархан этээччи Семен Черноградскай о.д.а. тэрээһиннэринэн олус үчүгэй тэрээһин буолла.

Көмүлүөк аал уотун оттон Аар Дархан этээччи Семен Черноградскай алҕаата. Алгыс кэнниттэн Уус Алдан улууһун Оһуокайын араастарын Ньургуйаана Никитина көрдөрдө. Кымыс үҥкүүтүн оһуокайын, хайҕатар матыыптаах оһуокайы, найахылыы оһуокайы көрдөрдө. Алексей Яковлевич улуустарынан Оһуокай түмсүүтэ тэрийэрин ураты тутан хайҕаата. Хас биирдии улуус уратытын көрдөрөр үчүгэйин бэлиэтээтэ. Оһуокайы АГИКИ устудьуона Диана Петухова, ырыаһыт Василий Новоприезжай, Ньургуйаана Никитина, Семен Черноградскай о.д.а. эттилэр. Быыһыгар ырыанан эҕэрдэлээтилэр.

Арассыыйа  Суруналыыстарын сойууһун бэрэссэдээтэлин солбуйааччы Галина Алексеевна Бочкарева оһуокай түмсүүтүгэр аан бастаан кэлбитин, улуустарынан анаан оһуокайы тэрийбиттэрин сөбүлээбитин үллэһиннэ.

Марта Николаева