Хаартыска (скриншот) уонна видео -- Семен Кривошапкин тиксэриитэ.
Бүгүн Уус Алдан улууһун Тулуна нэһилиэгэр үс ньирэй төрөөбүтүн туһунан видео тарҕанан, дьон-сэргэ хаһаайыттары кытта тэҥҥэ үөрдүлэр.
«Ураанньык» диэн ынах хаһаайына Семен Кривошапкин бэлиэтииринэн, бүгүн үс игирэ ньирэй эбиэккэ күн сирин көрбүттэр. «Тута хаартыскаҕа түһэрээт, бэтэринээргэ ыыппытым», — диэн кэпсэтиибитин саҕалыыр Семен Константинович.
— Биһиги нэһилиэкпит били кыһын таһырдьа кыстаабыт Майаҕатта оҕус дойдута. Ол биһиги Тулунабытын дорҕоонноохтук сураҕырдыбыт оҕус хаһаайына мин ийэм бииргэ төрөөбүт быраата. Аны ийэм Розалия Гаврильевна бэйэтин ынаҕа үс игирэ ньирэйи төрөтөн, Тулунаны сураҕырта. Биһиги хаһаайыстыбабытыгар бу аан бастакытын игирэ, буолаары буолан, үс игирэ ньирэй төрөөтө. Ийэм 14-15 сааһыттан пиэрмэҕэ сүөһү көрөөччүнэн үлэлээн кэлбитин Үөһээ Айыылартан бэлэҕэ — үс игирэ ньирэйдэннэ. Бэйэтэ ааспыт сыл сэтинньитигэр 80 сааһын туолбута. Ураанньык улахан ынах, игирэни төрөтө илик. Бастаан утаа ийэм бастакы ньирэйи көрөн баран «оҕото кыра эбит, итэҕэс дуу?» диэн сирийэн көрбүтэ. Онтон «сиппит көрүҥнээх эбэтэр игирэлэнээри гыммыт дуу…» дии санаабыт. Мин «бүттүбүт» дии санаан дьиэбэр тахсыбытым. Сотору буолаат, ийэм «аны иккис ньирэй тахсан эрэр!» диэн көмөҕө ыҥырда. Кини эмиэ «дьэ, бүттүбүт» диэн ньирэйин аһатаат, дьиэтигэр тахсаары тэриммит. Ол сылдьан ынаҕын туругун көрөөрү гыммыта, иккис ньирэй быган эрэр үһү. Аны иккис ньирэйбитин аһата олордохпутуна, ынахпыт үсүһүн таһаарар. Дьэ, онон «сенсацияланан» олоробут, — диэн кэпсиир Семен Кривошапкин.
«Ааттаатыгыт дуо ньирэйдэргитин?» диэн ыйыппыппар, «этэҥҥэ бу түүн хоннуннар, сыыйа ааттыахпыт» диэн хоруйдаата хаһаайын. «Бэҕэһээ Ил Дархан олохтоох оҥорон таһаарыы кээмэйин элбэтэр туһунан ыйаахха илии баттаата ээ. Хата, Ураанньык ыйаах соругун бэйэтинэн толорбут дии» диэбиппэр, Семен Константинович «кырдьык даҕаны, этэҥҥэ буоллаллар, үһүөн, үс тыһы ньирэй, ынах буоллахтарына, үүт аһы хото биэриэ этилэр» диэн үөрэ-көтө эппиэттээтэ.
«Ураанньык — эбээм Мария Михайловна ийэм Розалия Гаврильевна ыал буоларыгар биэрбит ынаҕын соҕотох сыдьаана. Онон бу үс ньирэй ол ынах төрдүн салгыахтара турдаҕа…» — диэн Семен Кривошапкин кэпсэтиибитин түмүктээтэ.
Федор Кузьмич Попов 1921 сыл ахсынньы 8 күнүгэр Мэҥэ Хаҥалас улууһугар Иккис Баатара нэһилиэгэр Поповтар…
Дойду бэрэсидьиэнэ Владимир Путин Кыайыы параадын кэмигэр Арассыыйа аан дойду сэриитин таһаарбат туһугар үлэни ыытарын,…
Кыайыы диэн тыл сүрэҕи өрүкүппүт, эрэли үөскэппит, үтүөнү түстээбит бэлиэ тыл. Улуу Кыайыы күнүн көрсө…
Ыам ыйын 7 күнүгэр Саха Өрөспүүбүлүкэтин Үүнэр көлүөнэ тыйаатырыгар Арассыыйаҕа Дьиэ кэргэн, Саха Өрөспүүбүлүкэтигэр Оҕо…
Быйылгы дьыл ыам ыйын 8 күнүгэр Саха сиригэр бүттүүн спортивнай хамсааһыны саҕалаабыт, спорт үгүс көрүҥнэрин…
Улуу Кыайыы күнүгэр Саха сирин бырабыыталыстыбатын бэрэссэдээтэлэ Кирилл Бычков Аҕа дойду Улуу сэриитин бэтэрээннэригэр Алексей…