Уус Алдан учуутала 14 саастаах оҕоҕо хаҕыс сыһыанынан буруйданна

Уус Алдан оройуонун борокуратуурата 29 саастаах олохтоох холуобунай дьыалатыгар буруйдуур түмүгүн бигэргэттэ. Эдэр педагог сокуоннай саастарын ситэ илик оҕолорго хаҕыс сыһыанынан буруйданар.

Силиэстийэ быһаарыытынан, биир күн физкултуура учуутала уруок кэмигэр быласымаас турбанан 14 саастаах үөрэнээччини хаҥас атаҕын уонна куртахха охсубут.

Итини таһынан былырыын сэтинньигэ оскуолаҕа успуорт саалатыгар ити үөрэнээччини эриллибит тэтэрээтинэн иккитэ, хаҥас илиигэ биир төгүл охсубут, ол кэннэ икки илиитинэн таҥаһын уолугуттан тардыалаан хабарҕалаабыт.

Онон буруйданааччы сокуоннай сааһын ситэ илик оҕолору иитиигэ, үөрэтиигэ хаҕыс сыһыаннаах ньымалары туттубут. Холуобунай дьыала суут көрүүтүгэр ыытылынна. Холуобунай дьыаланы Чурапчытааҕы Силиэстийэлиир кэмитиэтин үлэһиттэрэ силиэстийэлээтилэр.

Бу иннинэ, 2024 сыл ахсынньытыгар, оройуон борокуратууратынан этиитинэн учууталы үлэтиттэн уураппыттар.