Уус Алдан улууһугар доруобуйа харыстабылын саҥа каадырдарын эҕэрдэлээтилэр

Уус Алдан улууһун Оройуоннааҕы киин балыыһатыгар  эдэр исписэлиистэри чиэстээтилэр. Быйыл улууска 11 саҥа исписэлиис үлэлии кэллэ.
Кинилэр ортолоругар невролог, стоматолог, терапевт быраастар бааллар. Ону таһынан Бэйдиҥэ, Сыырдаах сэлиэнньэлэригэр терапевт, биэлсэр уонна мэдиссиинискэй сиэстэрэлэр кэллилэр.

Кинилэри чиэстээһин үөрүүлээх тэрээһинигэр Уус Алдан улууһун оройуоннааҕы киин балыыһатын кылаабынай бырааһа Анна Петрова эҕэрдэлээтэ. Анна Саввична мэдиссиинискэй үлэһиттэр сүрүн соруктарынан эмтэнээччилэр доруобуйаларын тупсарыы, чэбдигирдии буоларын бэлиэтээтэ.
«Ханнык баҕарар эдэр исписэлиискэ үлэ саҕаланыыта: кини үлэлиэхтээх кэлэктиибэ, эйгэ, өйөбүл уонна идэлээх дьон уопуттара олус суолталаах.  Биһиги эһигини иллээх-эйэлээх кэлэктииппитигэр ыларбытыттан үөрэбит уонна сүрэхтэрин баҕатынан улууска кэлбит эдэр исписэлиистэр талан ылбыт идэлэриттэн санаалара түспэтигэр уонна үөрэтээччилэрин утумнааччылара буолалларыгар эрэнэбит», -– диэтэ.
Эдэр исписэлиистэри Уус Алдан улууһун баһылыга Алексей Федотов эҕэрдэлээтэ уонна улуус географиятын уратыларын, нэһилиэктэр баһылыктара эдэр каадырдары аҕаларга кыттыыларын уонна интэриэстэрин кэпсээтэ. Идэлээх сойуус бэрэссэдээтэлэ Александра Вихрева-Крылова биир идэлээхтэригэр кэлэктиип аатыттан өйдөбүнньүк бэлэхтэри туттарда.
Онтон эдэр быраастар, биэлсэрдэр уонна мэдиссиинискэй сиэстэрэлэр улуус нэһилиэнньэтин доруобуйатын туһугар кыһамньылаахтык үлэлииргэ эрэннэрдилэр.
Сыырдаах сэлиэнньэтин биэлсэрэ, 44 сыл ыстаастаах Мария Черкашина бэйэтин оннугар хаалларар Мария Петрованы эҕэрдэлээтэ уонна улуус балыыһатын салалтата каадырдары сөптөөхтүк туруорарыгар уонна өйөбүлүгэр махтанна. Арыылаах сэлиэнньэтин биэлсэрэ Айталина Ховрова Бэйдиҥэ бырааһа Күннэй Лукачевскаяҕа бэлэҕин туттарда уонна саҥа көҕүлээһиннэри киллэрэн түмсүүлээх буоларга ыҥырда.