Бүгүн социальнай ситимнэргэ эдэр дьон бэйэлэрин баҕаларынан Уус Алдан кыраныыссатын бөҕүн-саҕын ыраастаабыттарын туһунан видео-устуулара социальнай ситимнэринэн тарҕанна.
Урбаанньыт Савва Алексеев салайар Бороҕон нэһилиэгин «Вип-Аква» ыраас ууну кутан тарҕатар тэрилтэ ыччаттара соторутааҕыта киин куоракка айаннаан иһэн, Уус Алдан улууһун кыраныыссатыгар кыһыны быһа мунньуллубут бөҕү көрөн баран, атыттар курдук көннөрү ааһа турбакка, болҕомтоҕо ылбыттар.
— Уолаттарбынаан сүбэлэһэн баран, салгын сии таарыйа, бүгүн субуотунньуктуурга санаммыппыт. Сарсыарда 9 чаас саҕана тиийэн үлэбитин саҕалаабыппыт.
https://youtu.be/LN4HkObXQY0
Бэйдиҥэ суоппарын кытта кэпсэтэн, кини таһаҕас тиэйэр массыынатын кузовар тиэйэн, Өлтөх нэһилиэгин сыбаалкатыгар тиийэн куттарбыппыт. Уолаттар ас буһаран, үлэбит түмүгүн көрө-көрө, астына сибиэһэй салгыҥҥа олорон чэйдээбиппит. Биһиги бу маннык уопсастыбаннай үлэҕэ чугас дьоммут. Улууспутугар Реабилитационнай кииҥҥэ, элбэх оҕолоох ыалларга, Уус Алдан улууһугар ыытыллар араас аһымал аахсыйаларга, спортивнай күрэхтэһиилэргэ өрүү кыттабыт. Иллээх, сомоҕолоһуулаах кэлэктиип буолан, санаатыбыт да, кимтэн да этиттэриитэ, көрдөһүннэриитэ суох төрөөбүт дойдубутугар туох эрэ үтүө дьыаланы хайаан да оҥоро сылдьабыт, — диэн санаатын үллэһиннэ улуустааҕы дьаһалта пресс-сулууспатыгар Савва Алексеев.
Бастыҥ холобур өрүү батыһыннарыылаах буолааччы. Төрөөбүт дойдуга таптал уонна бэриниилээх буолуу бу маннык дьыалаттан саҕыллар. Уус Алдан улууһун Бороҕонун ыччаттарын курдук бэйэлэрин баҕа санааларынан араас үтүө дьыаланы оҥоро сылдьар эдэр дьон ахсааннара мантан инньэ атын да улуустарга элбиэҕэ диэн бүк эрэллээхпит!
Сообщить об опечатке
Текст, который будет отправлен нашим редакторам: