Уус-Алдаҥҥа Анатолий Константинов кэриэһигэр көҥүл тустууга турнир ыытыллыаҕа

САССР, РСФСР уонна ССРС успуорт маастара Анатолий Константинов кэриэһигэр көҥүл тустууга аһаҕас турнир ахсынньы 26 күнүгэр Уус-Алдан улууһун Суотту нэһилиэгэр ыытыллыаҕа.

Күрэхтэһиигэ үс ыйааһыҥҥа бастыҥнары быһаарыахтара, ону таһынан хапсаҕайга муҥутуур бастыыр иһин киирсии ыытыллыаҕа. Көбүөргэ эр дьон ортотугар 62, 68 уонна 74 киилэҕэ диэри ыйааһыннарга тустууктар киирсиэхтэрэ. Өрөспүүбүлүкэ сэттэ төгүллээх чөмпүйүөнэ, бэтэрээн-маастардар ортолоругар аан дойду чөмпүйэнээтин икки төгүллээх кыайыылааҕа Анатолий Константинов бэйэтин кэмигэр чуолаан бу ыйааһыннарга тустара.

Кыайыылаахтарга 30 тыһыынча солкуобай бириис, иккис миэстэлэргэ – 20-лии тыһыынча, үһүстэргэ – 10-нуу тыһыынча көрүллүбүт. Ону таһынан кыттааччылар ортолоругар хапсаҕайга муҥутуур бастыыр иһин киирсии ыытыллыаҕа. Күүстээхтэр булт саатыгар сэртипикээт тутуохтара.

Санатан эттэххэ, 2022 сыллаахха САССР үтүөлээх тириэньэрэ Анатолий Константинов кэриэһигэр ыытыллар турнир хапсаҕайга муҥутуур чөмпүйүөнүнэн Виталий Эспек буолбута.