Уус Алдаҥҥа эбийиэктэр тутуллууларын хонтуруоллуур ыстаап тэрилиннэ

Уус Алдан улууһун баһылыгын солбуйааччы Семен Бурнашев салайааччылаах улуустааҕы суһал ыстаап тэрилиннэ.

Бу ыстаап улууска тутулла турар эбийиэктэргэ тахсар кыһалҕалары туоратыыга тус болҕомтотун ууруоҕа.

Бу туһунан Уус Алдан улууһун дьаһалтатын пресс-сулууспата иһитиннэрэр.

Бүгүн үлэлиир бөлөх Тумул бөһүөлэгэр сылдьан, тутулла турар 90 миэстэлээх оскуола, 40 миэстэлээх оҕо уһуйаанын саҥа таас оскуола-саадын тутуутун көрдө. Манна эбийиэк сүрүн тирэхтэри түһэрии, ититиитин ситимин тардыы үлэлэрэ ыытыллаллар. Ону сэргэ хаарбах дьиэттэн көһөрүү бырагырааматынан тутулла турар 24 кыбартыыралаах олорор дьиэни көрөн бараннар, үлэ хаамыыта былаан быһыытынан сөпкө ыытылла турарын бэлиэтээтилэр. Эбийиэк бу сыл бүтүүтэ үлэҕэ киирэрэ былааннанар.