Уус Алдаҥҥа “Өйдөбүнньүк уотун уматыы” бырааһынньыктааҕы миитин ыытылынна

Уус Алдаҥҥа «Батыйа» комплекска Улуу Кыайыы 78 сылыгар аналлаах “Өйдөбүнньүк уотун уматыы” бырааһынньыктааҕы миитин ыытылынна. Аҕа дойду туһугар олохторун толук ууран туран хорсуннук охсуспут, эйэлээх олоҕу аҕалсыбыт бар дьоммутугар сүгүрүйэн туран, өйдөбүнньүк уот таһыгар тыыннаах сибэкки дьөрбөтүн уурууттан миитин саҕаланна диэн Уус Алдан улууһун  дьаһалтатын пресс-сулууспата иһитиннэрдэ.

Аҕа көлүөнэ дьон сырдык ааттара, хорсун быһыылара хаһан да умнуллубатын этэн туран, Улуу Кыайыы күнүнэн Ил Түмэн, улуус дьаһалтатын, Мүрү нэһилиэгин дьаһалтатын, улуустааҕы бэтэрээннэрин сэбиэтин ааттарыттан улуус олохтоохторун эҕэрдэлээтилэр.

Бу күн аҕа көлүөнэ хорсун суолларын холобур оҥостон, билиҥҥи кэм ыччаттара, буола турар байыаннай дьайыыга дойдуларын туһугар хорсуннук охсуһа сылдьалларын бэлиэтээн туран, олохторун толук уурбут биир дойдулаахтарыгар, Мүрү нэһилиэгиттэн Владимир Николаевич Баишевка, Найахы нэһилиэгиттэн Николай Леонидович Голиковка, Мүрү нэһилиэгиттэн Гаврил Гаврильевич Поповка өлбүттэрин кэннэ кэлбит, «Орден за мужество» уордьаннары кинилэр төрөппүттэригэр, кэргэттэригэр улуус дьаһалтатын баһылыга Алексей Федотов туттарда, итиэннэ Российскай Федерация Оборонатын Министерствотын «За воинскую доблесть» мэдээлинэн анал байыаннай дьайыы кыттыылааҕар Петр Лыткиҥҥа туттарылынна диэн улуус дьаһалтатын пресс-сулууспата суруйар.