Уус Алдаҥҥа маҕаһыыны умата сатаабыттара биллибит

Уус Алдаҥҥа полиция үлэһиттэрэ маҕаһыыны уоттуу сатааһыҥҥа уорбаланар киһини быһаардылар. Бу туһунан СӨ ИДьМ пресс-сулууспата иһитиннэрэр.

Урбаанньыт түүн маҕаһыынын аанын умата сатаабыттарын туһунан полицияҕа иһитиннэрбит.

Маныаха 44 саастаах киһи уорбаланарын быһаарбыттар. Бу киһи эрдэ наркотикка буруйданан сууттана сылдьыбыт.

Барыллаан быһаарбыттарынан, уорбаланааччы маҕаһыын аанын бэнсиининэн ыспыт уонна умаппыт. Уот маҕаһыын тас өттүн сиэбит. Умайыыны тута бэлиэтии көрөннөр, суһал сулууспалары ыҥырбыттар.

Уорбаланааччы маҕаһыын хаһаайынын кытта тус сыһыаннарыттан сылтаан умата сатаабытын эппит.

Холуобунай дьыала тэрилиннэ.