Уус Алдаҥҥа мэдиссиинэ саҥа массыыналара ыраах сытар сэлиэнньэлэргэ сүүрүөхтэрэ

Бэс ыйын 22 күнүгэр Ил Дархан Айсен Николаев доруобуйа харыстабылын тэрилтэлэрин салайааччыларын уонна улуус киин балыыһаларын кылаабынай быраастарын кытары көрсүбүтэ. Бу күн балыыһа кылаабынай быраастарыгар 42 саҥа массыына күлүүһүн туттарбыта.

Ол иһигэр, Уус Алдан улууһун Оройуоннааҕы киин балыыһатын автопаарката 5 саҥа массыынанан эбилиннэ.

«Бу массыыналар Суотту, Тумул, Сыырдаах, ону сэргэ ыраах сытар Дыгдал уонна Кыллай сэлиэнньэлэргэ мэдиссиинэ үлэһиттэригэр олус туһалаах буолуохтара», — диэн Уус Алдан киин балыыһатын кылаабынай бырааһа Анна Петрова үөрүүтүн үллэһиннэ.