Уус Алдаҥҥа салгына тахсыбыт эрэһиинэ тыылаах балыксыты быыһаатылар

Уус Алдан улууһугар балыксыт эрэһиинэ тыылаах күөл ортотугар тиийэн салгына тахсан барбыт. Бороҕон сэлиэнньэтин олохтооҕор ЫБМ үлэһиттэрэ көмөҕө тиийбиттэр.

Бу туһунан ЫБММ  управлениетын пресс-сулууспата иһитиннэрдэ. Балыксыты быһылаан буолбут сириттэн ГИМС иниспиэктэрдэр таһаарбыттар.

«Быыһыыр сэлиэччиги мэлдьи кэтиҥ! Эһиги үчүгэйдик харбыыр да буоллаххытына, ууга эһиги бастыҥ доҕоргут. Ууга киириэх иннинэ тыыга, мотуор уонна бары тэрил туругун бэрэбиэркэлээҥ. Чугас дьоҥҥутугар ханна айанныыргытын уонна хаһан төннөр сабаҕаланар кэмҥитин этиҥ. Тыыга ыарахан ыйааһыннаах тэриллэри тиэйимэҥ уонна итирик туруктаах ууга кииримэҥ. Күн-дьыл туругун кэтээн көрүҥ», — диэн санатар ЫБМ Уус Алданнааҕы  учаастагын салайааччыта Еремей Бубякин.