Уус дьиэтэ баар буолла

Ытык Таатта сиригэр “Симэх” национальнай киин уонна Таатта улууһун дьаһалтатын сөбүлэһиилэригэр олоҕуран, Былатыан Ойуунускай аатынан Тааттатааҕы норуодунай тыйаатырга Уус дьиэтин үөрүүлээх быһыыга-майгыга арыйдылар.

Уус дьиэтин арыллыытыгар Б.Ф.Неустроев-Мандар Уус, Тааттааҕы норуот айымньытын дьиэтин дириэктэрэ Г.Г. Вырдылин, Таатта улууһун мунньаҕын бэрэссэдээтэлэ П.П. Максимов, “Симэх” норуот ускуустубатын уонна уус-уран оҥоһуктарын национальнай киинин уус-уран оҥоһуктары сайыннарар салаатын салайааччыта Д.К.Осипов аалай кыһыл лиэнтэни быстылар, эҕэрдэ тыл эттилэр.

Уус дьиэтигэр тимиринэн гравировка, маһынан, туоһунан, туойунан, кылынан-сиэлинэн, талах оҥоһуктарга, сахалыы таҥастары тигиигэ, оҕуорунан, тириинэн иистэниигэ, сувенир оҥоруутугар, муостан, ювелирнай оҥоһуктарга барыта 12 миэстэтэ тэрилиннэ. Барыта 12 көрүҥҥэ олохтоохторго анаан араас маастар-кылаастар ыытыллыахтара. Уус дьиэтэ уран тарбахтаахтар түмсүэр, маастардар үлэлиир, уһанар миэстэлэринэн буолуоҕа.  Маны сэргэ, Таатта улууһун маастардарын галереята аһылынна. Бу күн Таатта улууһун маастардарын быыстапката тэрилиннэ.

«Симэх киин»

Хаартыскаҕа Марианна Степанова түһэриитэ