Уус Куйгаҕа саҥа водозабор уонна ыраастыыр ыстаансыйа тутуллуоҕа

Уус Куйгаҕа улахан бырайыак олоххо киирэрэ былааннанар. Ол курдук саҥа  водозабор, ыраастыыр ыстаансыйа итиэннэ тымныы уунан хааччыйар ситим тутуллуоҕа.  Бу туһунан Ил Дархан  Айсен Николаев  Усуйаана улууһугар оробуочай сырыытын кэмигэр иһитиннэрдэ. 

Усуйаана оройуонугар сир үрдүнээҕи кыра кыамталаах атомнай ыстаансыйа тутуллар.  Бэҕэһээ  ыстаансыйа бастакы эбийиэгин — тутааччылар олорор сирдэрин арыйдылар.  Манна балтараа сыл иһигэр саҥа вобозабору тутар былааннаахтар. Инньэ гынан уунан Уус Куйга бөһүөлэгэ эмиэ хааччыллыаҕа. Билиҥҥитэ бөһүөлэккэ 700-кэ киһи олорор.

«Бүгүҥҥү туругунан нэһилиэнньэлээх пуун 100 кубтаах урукку 80-с сыллардааҕы водозабортан хааччыллан олорор.  Саҥа водозабор тутулуннаҕына,  эргэ тутуу үлэтэ тохтотуллуоҕа», — диэтэ Айсен Николаев.

Маны таһынан ыраастыыр ыстаансыйа уонна уу ситимнэрэ тутуллуохтара.

Тутууну «Русатом Оверсиз» уонна  «Теплоэнергосервис» АУо үбүлүүллэр.

Санатан эттэххэ, кыра кыамталаах атомнай  ыстаансыйаны 2028 сылга тутан үлэҕэ киллэрэр былааннаахтар.