Уус Маайаҕа аҥаарыгар диэри уунан туолбут оҥочону буллулар

Уус Маайа улууһугар 62 саастаах эр киһини көрдүүллэр. Кини мотуордаах оҥочотун Солнечнай бөһүөлэктэн 73 км тэйиччи сиртэн буллулар. Камуфляж өҥнөөх оҥочото аҥаарыгар диэри уунан туолбут, онно сүппүт киһи тус маллара уонна саата бааллар. Бу туһунан Быыһыыр сулууспата иһитиннэрэр.

Yamaha мотуордаах «Крым» оҥочону Чегда учаастактан балаҕан ыйын 30 күнүгэр булбуттар. Бу туһунан иһитиннэрии Уус Маайатааҕы ЕДДС-ка алтынньы 1 күнүгэр киирбит. Ол күн полициялартан, дьаһалта бэрэстэбиитэллэриттэн, олохтоохтортон турар көрдүүр бөлөх тэриллибит.

Ааллаах Үүн кытылын көрбүттэр. Тугу да булбатахтар. Көрдөөһүн салҕанар. Быһылаан СӨ Быыһыыр сулууспатын хонтуруолугар сылдьар.