Уус-Маайаҕа дьахтар ыалдьыты түөскэ быһаҕынан анньан сууттанна

Уус-Маайа улууһугар 49 саастаах олохтоох дьахтар итирик сылдьан эр киһини быһаҕынан түөскэ анньыбытынан усулуобунайдык көҥүлэ быһылынна.

Иирсээн бу сайын арыгы иһии түмүгэр тахсыбыт. Эмсэҕэлээччи ыаллыы олорор дьахтары аһара киниэхэ көмөлөһөрүн иһин сэмэлээбит. Дьахтар кыыһыран, киниэхэ кэргэнэ буолбатаҕын уонна кими баҕарар кытта алтыһарын ыйар бырааба суоҕун санаппыт. Этиһии кэмигэр дьахтар куукуна быһаҕын харбаан ылан, ыалдьытын түөһүн туһаайыытынан биирдэ анньыбыт.

Эмсэҕэлээччи олоххо кутталлаах бааһырыыны ылбыт. Сууттанааччы дьахтар буруйун толору билиммит уонна кэмсиммит. Суут чэпчэтэр быһыылары-майгылары — силиэстийэҕэ көмөлөспүтүн, кэмсиммитин учуоттаан, дьахтарга 4 сыл 6 ыйга болдьохха усулуобунайдык көҥүлүн быһарга уураахтаабыт. Ону таһынан киниэхэ хааччахтар сүктэриллибиттэр: олорор сирин уларытара, биллэрбэккэ эрэ атын сиргэ барара бобуллар, ону тэҥэ хонтуруоллуур уорганҥa ый аайы бэлиэтэнэр эбээһинэстэммит. Суут быһаарыыта сокуоннай күүһүгэр өссө киирэ илик, диэн СӨ Сууттарын холбоһуктаах пресс-сулууспата иһитиннэрэр.