Уус Маайаҕа күргэ сууллубутунан борокуратуура бэрэбиэркэ ыытта

Өрөспүүбүлүкэ борокуратууратын сорудаҕынан, Уус Маайа улууһун борокуратуурата Шептунчик үрэҕинэн күргэ сууллубутун туһунан тахсыбыт иһитиннэриилэринэн бэрэбиэркэ ыытта. Бу туһунан СӨ Борокуратууратын пресс-сулууспата иһитиннэрэр.

Кэлин быһаарыллыбытынан, «Амма» суол 497+243 км баар Шептунчик (Элдьикээн) үрэҕи туоруур массыына күргэтэ СӨ «Саха сирин суолларын управлениетын» балаансатыгар баара биллибит. Тэхиниичэскэй туругун сыанабылынан, күргэ саахалланар туруктаах, ол үрдүнэн хапытаалынай өрөмүөн ыытыллыбатах, бүтэһик өрөмүөн үлэтэ 2013 сыллаахха ыытыллыбыт.  Борокуратуура судаарыстыбаннай хааһына тэрилтэтигэр сокуону кэһиини туоратарга этии киллэрдэ уонна хонтуруолга ылла. Билиҥҥи кэмҥэ үрэҕи туоруур күргэ чөлүгэр түһэрилиннэ.