Уус Маайаҕа сүппүт эр киһи көһүннэ
![](https://sakha-sire.ru/wp-content/uploads/2024/07/89-900x596.jpg)
Уус Маайа улууһугар Белькачи сэлиэнньэттэн чугас сүппүт 37 саастаах эр киһи көһүннэ.
Тыаҕа муммут эр киһи икки нэдиэлэнэн ойуур баһаарын умуруорар бириигээдэ лааҕырыгар бэйэтэ тиийбит. Бу туһунан Саха сиринээҕи Быыһыыр сулууспатын пресс-сулууспата иһитиннэрэр.
Санаттахха, баҕа санаатынан ойуур баһаарын бохсууга тиийбит эр киһи от ыйын 10 күнүгэр биригээдэ лааҕырыттан чугас дэриэбинэҕэ айанныырга санаммыт уонна тиийиэхтээх сиригэр көстүбэтэх. От ыйын 12 күнүгэр кинини көрдүү «Полярные авиалинии» АХ бөртөлүөтүнэн биэс быыһааччы көппүт. Көрдүүр-ирдиир дьаһалларын түмүгэр киһи булуллубатах. Ол кэннэ түөрт быыһааччы, үс «Авиалесоохрана» үлэһиттэрэ уонно олохтоох дьон көмөлөрүнэн көрдүүр үлэ нэдиэлэттэн ордук хонук устата ыытыллыбыт. Муммут киһи биир да аһа-үөлэ суох сылдьан, чалбахтан уу иһэ сылдьыбыт. Иккитэ тыатааҕыны көрсүбүт эрээри, хата, дьолго адьырҕа кыыла тыыппатах. Минерализованнай балаһаны көрөн, ол устун кыйа батыһаннаран айаннаабыт.
Бэҕэһээ, от ыйын 20 күнүгэр, киэһэ 5 чаас кэннэ сүппүт эр киһи лааҕырга бэйэтэ тиийбит. Наһаа ырбыт, дьүдэйбит эр киһини балыыһаҕа киллэрдилэр.
Сообщить об опечатке
Текст, который будет отправлен нашим редакторам: