Уус Маайаҕа уонна Томпоҕо үрдүк бэлэмнээх буолуу эрэсиимэ биллэрилиннэ

СӨ Гражданскай оборуона дьыалаларыгар уонна нэһилиэнньэ олоҕор—дьаһаҕар куттал суох буолуутун хааччыйар миниистирэ Дмитрий Лепчиков салайыытынан муниципальнай тэриллиилэр уорганнара үрдүк бэлэмнээх буолуу эрэсиимҥэ көһөрүлүннүлэр.

Гидрометеосулууспа сылыктыырынан, чугастааҕы сууккаҕа Алдан оройуонугар уу таһыма түһүөҕэ, оттон Уус Майа уонна Томпо оройуоннарыгар, төттөрүтүн, уу таһыма үрдүүрэ күүтүллэр.

Алдан оройуонун Чагда сэлиэнньэтигэр 13 олорор дьиэни халаан уута ылбыт. Уус Маайа уонна Томпо оройуоннарын нэһилиэнньэлээх пууннарыгар уу таһыма билигин муҥутуур кирбииттэн намыһах. Биирдиилээн намыһах сирдэри уу ылбыта бэлиэтэнэр, ол эрээри олорор дьиэлэр уонна социальнай эбийиэктэр эмсэҕэлээбэтэхтэр.

Уус Маайа-Петропавловскай хайысханан Кыталык диэн сиргэ суолу уу быһыттаабыта уонна Петропавловскай дэриэбинэҕэ киирии суолу уу ылбыта бэлиэтэммит. Итини сэргэ Уус Маайаттан Петропавловскай дэриэбинэҕэ быстах кэмҥэ олордор эбийиэккэ тиийэр суол эмиэ ууга былдьаммыт. Олохтоох дьаһалтаҕа иһитиннэрэллэринэн, экэниэмикэ эбийиэктэригэр куттал суоһаабат.

«Бары бэлэм олоробут. Намыһах сирдэринэн быстах кэмҥэ дамбаны оҥорууга дьаһаллар тэрилиннилэр. Ону сэргэ уу таһыма үрдээһинин туһунан олохтоох нэһилиэнньэҕэ иһитиннэриилэри тиэрдиигэ болҕомтону уурдубут», — диэн бэлиэтээтэ Лепчиков. Алдан өрүскэ уу таһыма үрдээбитинэн дьоҕус суудуналар хаһаайыннарыгар ууга тахсалларыттан тутунулларыгар эбии иһитиннэриилэри тиэрдиигэ ГИМС сулууспатыгар эбии соруктар туруорулуннулар.

Ону тэҥэ быстах кэмҥэ олорор пууннар тэриллиэхтэрэ. Оттук сезона түмүктэммитинэн, бу пууннарынан олохтоох дьаһалта итиитиинэн хааччыйалларыгар тэрээһиннэр ыытыллыахтара. Бу туһунан СӨ Ил Дарханын уонна Бырабыыталыстыбатын пресс-сулууспата иһитиннэрэр.