Уус Маайа оройуонугар уу таһымын кэтээн көрөллөр

Уус Маайа оройуонугар уу таһыма үрдээбитинэн сибээстээн, үрдүк бэлэмнээх буолуу эрэсиимэ киллэрилиннэ.

Бары сулууспалар бары бигэргэтиллибит боротокуолларынан сөп түбэһиннэрэн үлэлииллэр, нэһилиэктэр баһылыктара миэстэлэригэр бааллар, халаан уутун таһымын кэтээн көрүүлэрэ ыытыллаллар. Бу туһунан оройуон баһылыга Александр Азаров иһитиннэрдэ.

Кини этэринэн, халаан уута намыһах сирдэри ылар. Ол да буоллар, билиҥҥи кэмҥэ нэһилиэнньэни эвакуациялааһын ирдэммэт. Олохтоохтор ортолоругар өйдөтөр үлэлэр ыытыллаллар.

«Биһиги бары наадалаах тэрээһиннэри ыытабыт. Билигин оройуоҥҥа киритиичэскэй балаһыанньа суох, ЫБМ эрэсииэ киллэриллибэт», — диэн оройуон баһылыга бэлиэтээтэ.
Нэһилиэнньэни аһынан-үөлүнэн, эминэн-томунан, уунан уонна тырааныспарынан хааччыйыы толору кээмэйинэн ыытылынна. Сылааһынан хааччыйар тэрилтэлэр уонна энергетика эбийиэктэрэ штатнай эрэсииминэн үлэлииллэр.

Быстах кэмҥэ олордор (ПВР) пууннар бэлэмнээхтэрэ бигэргэтилиннилэр — эппиэттээх дьону анаатылар, наадалаах малларынан хааччылыннылар. Чөлүгэр түһэриигэ уонна быстах кэмҥэ олордор пууну тэрийиигэ 5 мөл. солк. кэриҥэ үп-харчы көрүллүбүт. Бородууктаны уонна иһэр ууну тиэрдиигэ дуогабардар түһэрсилиннилэр. Үөрэх бырасыаһыгар кэһиллии тахсыбата — БКЭ-ни туттарыы кыраапыгынан ыытыллар.

«Оскуолалары халаан уута ылбата, онон үөрэх бырсыаһа тохтообото. Аһы-үөлү уонна сибээһи тиэрдиигэ резервнэй источниктар бааллар», — диэтэ Уус Маайа оройуонун баһылыга. Бу туһунан СӨ Ил Дарханын уонна Бырабыыталыстыбатын пресс-сулууспата суруйар.

Уу эбийиэктэригэр буруйу оҥорууну уонна быһылааны тахсыытын сэрэтэр, туоратар сыалтан, барыбыттан болҕомтолоох буолуу ирдэнэр. Уу эбийиэктэригэр куттал суох буолуута – биһиги барыбыт уопсай эппиэтинэспит. Бэйэбит уонна чугас дьоммут олохторун, доруобуйаларын харыстыыр туһугар, бары ирдэбиллэри тутуһан, сэрэхтээх буолуоҕуҥ! Этэҥҥэ сылдьыҥ!