Уус-Ньара «Тымныы полюһа» кыһыҥҥы туризм бэстибээлигэр бэлэмнэнэр

Үгэскэ кубулуйбут «Тымныы полюһугар айан 2026» бэстибээл улууска кулун тутар 28 күнүттэн 30 күнүгэр диэри ыытыллыаҕа.

Кыһыҥҥы туризм бэстибээлэ геолог-учуонай, чинчийээччи Сергей Обручев салайааччылаах Индигиир эспэдиисийэтин 100 сылыгар уонна Арассыыйа норуоттарын сомоҕолоһууларын сылларын чэрчитинэн ыытыллар. Бэстибээл Тымныы полюһун ураты сирдэригэр – Уус-Ньараҕа, Өймөкөөҥҥө, Томторго уонна Сордоҥноххо буолуоҕа. Ыалдьыттар хоту сир кыһыҥҥы эйгэҕэ умсугуйан, олохтоох омуктар култуураларын кытта билсиэхтэрэ, экстремальнай усулуобуйаҕа бэйэлэрин бэрэбиэркэлиир кыахтаныахтара.

Сүрүн тэрээһин Уус-Ньараҕа Индигиир өрүс үрдүгэр Муус пааркаҕа ыытыллыаҕа. Онно сыл сүрүн тэрээһинигэр «Тымныы полюһугар айан» өрөспүүбүлүкэтээҕи бэстибээл аһыллыыта, «Эр санаа полюһа» автотур кыттыылаахтарын параада, хайаҕа тахсыы спортивнай күрэхтэһиилэр, ону таһынан Тымныы Хаһаайыныгар  Чысхааҥҥа тымныы бэлиэтин төнүннэрэр сиэр-туом ыытыллыаҕа.

«Чысхаан оонньуулара» хамаанданан күрэхтэһиилэр туристар болҕомтолорун тардыахтара. Бэстибээл кыттыылаахтара бары «Строганина» шоу күрэҕин астына көрүөхтэрэ. Хаар уонна муус аттракционнарын сэргэ оҕолору аралдьытар бырагыраама эмиэ баар буолуоҕа. Тэрээһиннэри бары икки күн иһигэр биир тэҥинэн ыытыллыахтара. Онон Үрбэ Хайатын уонна Уус-Ньара Киһилээх хайаларын икки ардыгар киин уулуссаларынан массыыналар субулла туруохтара. Тэрийээччилэр туристары биллэр-көстөр Өймөкөөн хайаларыгар – Киһилээххэ ыалдьыттата ыҥырыахтара. Сатыы уонна бураанынан экскурсиялар баар буолуохтара. «Долина Дракона» хайыһар баазатын хаһаайыттара ыалдьыттарыгар хайаҕа тахсыы бырагырааматын бэлэмнии сылдьаллар. Ыалдьыттарга биир  умнуллубат «Сулустаах түүнү» сүдү очуос хайалар быыстарыгар хонон турууну бу баазаҕа бэлэхтиэхтэрэ.

Бэстибээл бастакы күнүгэр киэһэ «Металлург» Култуура дьиэтэ туристары «Тымныы полюһа» кэрэ куо куонкуруска ыҥырыаҕа. Туристарга анаан «Чысхаан ыалдьыттары көрсөр» киэһээҥҥи бырагыраама Уус-Ньараҕа кыһыҥҥы туризм бэстибээлигэр сылдьыбыт туристарга умнуллубат өйдөбүлү хаалларыаҕа.

Бэлиэ түгэн иккис күнүгэр, кулун тутар 29 күнүгэр, Уус-Ньара  Киһилээх хайатын анныттан Үрбэ хайатыгар тиийэ хайыһар базатыгар диэри скайраннинг күрэхтэһиитэ (түргэнник сүүрэн тахсыы) буолуоҕа. Бу көрүҥ аан бастаан Эбэ Хайаҕа Томтор нэһилиэгэр ситиһиилээхтик ыытыллыбыта. «Чумҥа түүн» — Үрбэ хайатын анныгар баар тоҥуу хаарга  туруоруллубут сылаас балааккаларга хонон  туруу. Бу хас биирдии турист ыра санаата.

Бэстибээл атын тэрээһиннэрин кытта тэҥэ кулун тутар 29 күнүгэр “Долина Драконов” хайыһар баазатыгар этническэй сиэр-туом ыытыллыаҕа. Оройуон киинин хайыһар баазатыгар экскурсия, хайыһар, дьиэ кэргэнинэн сынньалаҥ — барыта баар буолуоҕа. Кафе үлэлиэҕэ, дьиэлэр уонна балааккалар арендаланыахтара. “Долина Драконов” хайа баазатыгар сноубордка уонна хайыһарга күрэхтэһиилэр ыытыллыахтара. Бу күн Индигиир өрүскэ хаар устун аан бастаан кыһыҥҥы джип сүүрдүүтэ буолуоҕа.

«Тымныы полюһа» кыһыҥҥы туризм бэстибээлин тэрийээччилэр улахан кутталлаах экстремальнай спорт көрүҥнэригэр улахан болҕомтону уурдулар. Ол курдук, хайаҕа тахсыы, сноуборд уонна скайраннинг, куттаныыны кыйдыыр уонна уустук усулуобуйаҕа бэйэни көрдөрөр кыаҕы биэрэр. Маны барытын тэрийээччилэр толору учуоттаатылар. Бэстибээлгэ идэтийбит экстремал-спортсменнар буолбакка, сүрүннээн спорду таптааччылар уонна айанныыры сөбүлүүр туристар түмсүөхтэрэ диэн бэлиэтиир тоҕоостоох. Биллэн турар, ыалдьыттыы кэлбит туристарга Өймөкөөн ыраас кыһыҥҥы айылҕатын уонна араас мүччүргэннээх уонна үөрүүлээх уонна умнуллубат абылыыр  түгэннэри кыһыҥҥы туризм бэстибээлин кэмигэр Тымныы полюһа бэйэтэ булан бэлэхтээн иһиэҕэ. Манна өссө Муус пааркаҕа үҥкүүгэ күрэһи, түүҥҥү салюту уонна «тымныы» дискотеканы эбэн кэбис!

Кулун тутар 30 күнүгэр кыһыҥҥы туризм бэстибээлэ аны тыа сиригэр салгыы ыытыллыаҕа. Чысхаан Тымныы символын  Муус Резиденциятыттан   таһаарыытын сиэрэ-туома сиэр-туом ыытыллыаҕа. «Өймөкөөн амтана» – гастрономическай бэстибээл  эбээн уонна саха астарын амсатыаҕа. «Тымныы полюһа» стелаҕа хаартыскаҕа түһэр кыах баар буолуоҕа. Чысхаан Тымныы полюһун ыалдьыттарыгар Туоһу суруктарын туттарыаҕа.  Тымныы полюһун уус-уран галереятыгар сылдьыы тэриллиэҕэ. Аан бастаан  Өймөкөөн улууһун 1-кы гильдиялаах меценат-атыыһыта Н.О. Кривошапкин олорбут балаҕаныгар баайы-дуолу тардар сиэр-туом ыытыллыаҕа.

“Тымныы полюһа”  кыһыҥҥы туризм бэстибээлигэр диэри бириэмэ баһаам. Онон сыл сүрүн тэрээһинигэр чугас аймахтаргытын, доҕотторгутун, биир идэлээхтэргитин, айаны сөбүлээччилэри бука барыларын эрдэттэн ыҥырыҥ.  Саха сирин туристическай брендэ, Тымныы полюһа Өймөкөөн ыытыллыбыт историятын тухары аан бастаан оройуон киинигэр, куораттыы тииптээх Уус-Ньараҕа ыытыллар. Онон бу кыһыҥҥы туризм спортивнай бэстибээлин быһыытынан туризм бастыҥ бырайыагынан буолара саарбаҕа суох. Кэлиҥ, сылдьыҥ, ыалдьыттааҥ!